Komeleya Mezopotamyayê bi piştgiriya xelkê Bakur û Rojhilatê Sûriyeyê û çalakiyên saziyan karwanekî alîkariyên mirovî ji bo malbatên mexdûr ên li Siwêdayê amade kiriye. Li gorî organîzatoran alîkarî ji 55 ton xurek û ard pêk tê. Karwan gihaşt Reqayê û amadekariya ber bi Siwêdayê bikeve rê dike.
Tê payîn ku îro karwanê alîkariyan bikeve rê. Lê komeleyê dema şandina wê zelal nekir. Li gorî agahiyên bi dest ketine karwan dê li Şamê tev li karwanên alîkariyên ên din ên komeleyên xwecih ên Sûriyeyê bibe, da ku ber bi Siwêdayê ve bikevin rê.
Komeleyê li ser rûpela xwe ya fermî destnîşan kir ku ev xebat wek beşeke bersiva komeleyê ji bo rewşên dijwar ên li Siwêdayê ye.
Ji 13ˊê Tîrmehê ve, ji ber êrîşên leşkerî yên di navbera hêzên hikumeta veguhêz-çekdarên girêdayî wê û hêzên leşkerî yên xwecih ên li Siwêdayê de, rewşeke giran a mirovî derket. Ji ber van êrîşan hezar û 472 kesat hatine kuştin, zêdetirî 150 hezar kes koçber bûne û binesazî wêran bûye.
Niha Siwêda û gundewarên wê rewşa agirbestê heye. Lê li kêleka wê aliyên ewlehî yên girêdayî hikumeta veguhêz a Sûriyeyê ambargoyek û krîza jiyanî ya kûr heye. Hîna jî karwanên alîkariyan ên Rêveberiya Xweser a Herêma Bakur û Rojhilatê Sûriyeyê yên ji bo Siwêdayê, di depoyan de, li benda bersivdana hikumeta veguhêz e.
Li gorî agahiyan, desthilata hikumeta veguhêz rê nade alîkariyên mirovî yên Rêveberiya Xweser derbasî Siwêdayê bibe. Rêveberiya Xweser destnîşan kir wan bi rêya Daîreya Têkiliyên Derve û Meclisa Rêveber hewldanên xwe kirine, ku korîdoreke ewle ji bo derbaskirina alîkariyan were vekirin. Ji bo alîkarî bêyî tu astengiyan bigihînin kesên zirar di komkujiyê de dîtine.
Hevya Sor a Kurd di 23’yê Tîrmehê de ji bo mexdûrên êrîşa li dijî Siwêdayê kampanyaya alîkariyan ragihand. Di wê çarçoveyê de li gelek bajaran dest bi kampanya komkirina alîkariyan hate kirin.
