Kongreya Civaka Demokratîk a Kurdistaniyên li Ewropayê (KCDK-E) têkildarî êrîşa hêzên dewleta Tirk a li ser Bendava Tişrînê daxuyaniyeke nivîskî da. KCDK-E’yê di daxuyaniya xwe de êrîş şermezar kirin û diyar kir ku êrîş li dijî pêvajoya çareseriyê ya heyî derbeyek e û bang li her kesî kir ku li hemberî êrîşan bêdeng nemînin.
Naveroka daxuyaniya KCDK-E’yê bi vî rengî ye:
“Em bawer dikin ku pirsgirêkên heyî ne bi rêbazên leşkerî, divê bi dîplomasî, diyalog û mekanîzmayên çareseriya demokratîk werin çareserkirin. Pêşniyarên çareseriyê yên Rêber Apo yên li ser bingeha paradîgmaya “Neteweya Demokratîk”, dikarin bingeha jiyana hevpar a bi aştiyane ya gelan û aramiya herêmî pêk bînin. Lê belê êrîşên li ser Bendava Tişrînê weke parçeyek ji polîtîkayên ku li şûna çareseriyê wêranî û alozîyê zêde dikin, têne nirxandin.
Li gel geşedanên li Sûriyeyê, operasyonên leşkerî yên ku Tirkiye bi komên bi navê Artêşa Neteweyî ya Sûriyê (SMO) re dimeşîne, di warê mafên mirovan ên navneteweyî û hiqûqa mirovî de fikarên cidî derdixin holê. Bendava Tişrînê ne tenê çavkaniyeke enerjîyê ye; ew ji bo herêmeke berfireh a Sûriyeyê av, enerjî û avdana çandiniyê peyda dike û binesaziyeke jiyanî ye. Ji ber vê yekê, êrîşên li ser bendavê rasterast şert û mercên jiyana bingehîn ên gelê sivîl dikin armanc û di çarçoveya hiqûqa navnetewey de weke sûcên giran ên li dijî mirovahiyê têne hesibandin.
Di êrîşên berê yên li ser niştecihên sivîl ên herêmê de gelek kesan jiyana xwe ji dest dane û bi sedan kes birîndar bûne. Îro êrîşên li ser Benda Tişrînê ne tenê ji bo gelên herêmê di heman demê de ji bo hemû nirxên hevpar ên mirovahiyê jî gefê çêdikin.
Em weke Kurdên li Ewropayê dijîn, bawer dikin ku li hemberî van êrîşan divê em bêdeng nemînin. Di çarçoveya hiqûqa navneteweyî û nirxên mirovî de, parastina aşitî, demokrasî û îradeya jiyana bi hev re ya gelan, erka me hemûyan e. Di vê çarçoveyê de, em bang li raya giştî ya Ewropayê dikin ku ewlehiya sivîlan biparêzin, astengiyên li pêşiya alîkariyên mirovî rakin û piştgiriyê bidin hewldanên aştiyê yên li herêmê.
Em weke KCDK-E’yê ji bo jinûvezindîkirina ruhê berxwedana hevpar a li Kobanê derketiye holê, ji bo xwedîderketina li Bendava Tişrînê û Rojava, bang li hemû Kurdistanî, heval û dostên me yên li Ewropayê dijîn û sazî û rêxistinên demokratîk dikin ku di çarçoveya çalakiyên aştiyane û demokratîk de bi hev re têbikoşin û piştgiriyê bidin vê yekê.”
