Di daxuyaniyan de êrîş weke ‘qirkirinê’ hatin pênasekirin û banga nerazîbûnê hate kirin.
RIHA
Rêxistina Pirsûsê ya Partiya Demokrasî û Wekheviyê ya Gelan (DEM Partî) li ber avahiya partiyê daxuyaniyek da û komkujiya Elewiyan şermezar kir. Di dema daxuyaniyê de pankarta bi nivîsa ‘Qirkirin û komkujiyê bisekinînin, em bi Elewiyan re ne’ hate hildan û Hevserokê Bajêr ê DEM Partiyê Bekîr Karakeçîlî axivî. Bekîr Karakeçîlî destnîşan kir ku mafê hemû gelên li Sûriyeyê ye ku bi rengekî azad bijîn û komkujî şermezar kir.
Parlamenterê Rihayê yê DEM Partiyê Ferît Şenyaşar jî got, “Em komkujiya Elewiyan a li Sûriyeyê şermezar dikin. Divê ev desthilatdarî li ber vê komkujiyê rabe. Weke xelkê Pirsûsê em bi xelkê Elewî re ne.”
Aktîvîsta Tevgera Jinên Azad (TJA) Ayla Akat Ata jî berxwedana sala 2014’an a li Kobanê ya li dijî êrîşên DAÎŞ’ê bi bîr xist û got, “Doh El Nûsra, DAÎŞ bû, îro jî HTŞ ye.”
Ayla Akat Ata got, “Kurdan îradeya jiyana bi hev re danîn holê. Li Rojava îradeya jiyana bi hev re ye. Neteweyên Yekbûyî (NY) biryara kombûnê da. Beriya ku komkujî mezin bibe divê her kes li ber rabe.”
HATAY
Li navçeya Skenderûn a Hatayê jî Hêzên Ked û Demokrasiyê li Parka Saglikli Yaşam daxuyaniyek dan çapemeniyê. Hevserokê Şaxê Skenderûnê yê Komeleya Mafên Mirovan Coşkûn Selçûk diyar kir ku kiryarên HTŞ ne kêmî hovîtiya DAÎŞ’ê ne û diyar kir ku ‘êrîşên ji bo qirkirinê’ têne kirin.
Selçûk destnîşan kir ku yekane rêya rawestandina komkujiyên li Sûriyeyê avakirina sîstemeke demokratîk, azad û wekhev e.
