Daxuyaniya Dîwana Hevserokatiyê ya KONGRA-GEL bi vî rengî ye:
“Em rojbûna 76’an a Rêber Apo bi hezkirin û hurmeteke mezin pîroz dikin. 4’ê Nîsanê rojbûna Kurdên azad, jinên azad, mirovên azad e.
Ji bo gelê Kurd ê bi polîtîkayên qirkirina çandî û fîzîkî li ber tinebûnê bû, 4’ê Nîsanê roja jinûve jiyana azad e. Ji ber vê yekê gelê me yê welatparêz bi taybetî jî jin 4’ê Nîsanê weke rojbûna xwe pîroz dikin. Li ser vê bingehê em 4’ê Nîsanê ji dil li gelê xwe û jinan pîroz dikin.
Hemû welatparêzên xwe yên beşdarî meşa ji Amedê heta Amarayê bûne silav dikin, ku bi pêşengiya ciwanan bi dirûşma ‘Rojbûna te pîroz be ey Rêber Apo’ tê lidarxistin.
Newroza 2025’an bû Newroza herî bi heybet ku bi dirûşma ‘Rêbertiya Azad, civaka demokratîk’ hate pîrozkirin û weke referandûmeke gel a ku daxwaza azadiya Rêber Apo lê hate kirin, derbasî nava rûpelên dîrokê bû.
Ji niha û pê ve karên li her qadê bêne kirin wê bi armanca azadiya fîzîkî ya Rêber Apo bêne kirin. Azadiya fîzîkî ya Rêber Apo tê wateya guhertina polîtîkayên înkar û îmhayê yên sed salî yên dewletê. Nêzîkatiya dewletê ya li Rêber Apo nîşaneya nêzîkatiya li mijara çareseriya demokratîk e.
Banga 27’ê Sibatê ya Rêber Apo ku weke ‘Manîfestoya Sedsalê’ hate binavkirin, ji bo gelên Tirkiyeyê firsendeke dîrokî afirand. PKK’ê û gelê Kurd piştgiriyeke tam dan banga Rêber Apo.
Lê belê hikumeta AKP’ê heta niha bersiveke li gorî girîngiya stratejîk a vê banga dîrokî nedaye. Tevgera Azadiyê û gelê me bi hesasiyeteke mezin pêvajoyê dişopîne. Hemû hêzên demokrasiyê ku alîgirê banga ‘Aştî û civaka demokratîk’ a Rêber Apo ne, divê pêşengiyê ji vê pêvajoyê re bikin û ji bo ev firsenda dîrokî bi cih bê li ser bingeha ‘avakirina civaka demokratîk’ bi rola xwe rabin.
Em hemû çalakiyên ku li Kurdistanê û derveyî welat ji bo rojbûna Rêber Apo têne lidarxistin silav dikin. Bi coş û kelecana xwegihandina li Rêbertiya Azad li ser bingeha bîr û baweriya ku sala 2025’an bikin sala azadiyê em serketinê di karê gelê xwe û dostên xwe de dixwazin.”
