Piştî rewşa tenduristiyê çalakvanê greva birçîbûnê Arîstotelîs Chantzis hat asta krîtîk û şevê din rakirina nexweşxaneyê banga hevgirtinê hat kirin. Li paytexta Yewnanistan Atînayê bi hezaran kes li hev kom bûn.
Li ser banga Civata Dagirkirina Prosfygika (Malên Penaberan) û torên hevgirtinê, bi hezaran kes saet di 19.00’an de li Qada Syntagma kom bûn. Di hevdîtina ku li ber avahiya Parlamentoyê pêk hat de bal kişandin ser rewşa Chantzis ku şevê din ji ber zirara giran a norolojîk û xeteriya jiyanî rakiribûn Nexweşxaneya Gennimatasê.
Chantzis di roja 139’an a greva birçîbûnê de ye û Suzon Doppagne ji bo piştgiriyê ketiye greva birçîbûnê û di roja 54’an kde ye. Di çalakiyê de xwestin ku daxwazên kesên di grevê de ne bên qebûlkirin.
Li ser pankartên ku li qadê hatibûn daliqandin, gotinên Chantzis ê ku ji ber birçîbûna dirêj bi teşhîsa zirara akût a mêjî (sendroma Wernicke) rakirin nexweşxaneyê, “Yan edalet yan mirin pêk were em ê bi ser bikevin. Têkoşîn paşve gav navêje, berevajî wê ji nû ve dest pê dike” hatin nivîsandin.
Çalakvana li dijî projeyên veguherîna bajarî daxwaza demildest rawestandina planên tehliyekirinê yên ku bi qasî 400 kesên ji civata Prosfygika hedef digirin, kirin. Di çalakiya ku bi pêşengiya Civata Dagirkirina Prosfygika û komên hevgirtinê hat lidarxistin de banga betalkirina projeyên veberhênan û veguherîna taxê kirin.
Her wiha ji bo Chantzis ê ku li nexweşxaneyê tê dermankirin peyamên hevgirtinê hatin dayîn. Serokê Sendîkaya Şaredariyan û Karmendên Xizmetên Giştî yên Attîkayê û nûnerê Eniya Hemû Karkerên Milîtan (PAME) Spyros Konstantas çû serdana Nexweşxaneya George Gennimatas û piştgirî da daxuyaniya Serokê Federasyona Yekîtiya Bijîşkên Nexweşxaneyên Atînayê (OENGE/EINA) Giorgos Sideris.
Konstantas di serdanê de got, “Em bi têkoşîna hevrêyên xwe re di nav piştgiriyê de ne, em li kêleka wan in. Banga dikim ku rêzê ji daxwazên kesên ku li Prosfygikayê têdikoşin bigirin.”
Tê payîn ku çalakiyên piştgiriyê di rojên pêş de jî berdewam bikin.
