Ji bo destpêkirina sala nû ya Kurdî re kêmî mehekê maye. di vê çarçoveyê de li Rojhilatê Kurdistanê agirê Newrozê hate dadan. Li bajarê Sine bi hezaran kes li dora agirê Newrozê li hev civiyan.
Ji serê meha Adarê ve Gelê Kurd dest bi pîrozkirina Newrozê kirine, di 1’ê Adarê de li gundê Çeşmîder ya ser bi Sewlawa ya bajarê Sineyê, bi boneya sala nû ya Kurdî û hatina Newrozê, merasîmek pîrozbahiyê hate lidarxistin.
Di merasîmê de sîrûda neteweyî hate xwendin û bê navber dirûşmeya ‘Jin, Jiyan, Azadî’ û Bijî Kurdistan hate qêrîn. Di heman demê li heman gundê Çeşmîder yekem agirê Newrozê jî hate pêxistin. Her sal bi hezaran kes ji derdor, li gund amade dibin û Newrozê pîroz dikin.
Bi pêxistina agir govend tê geran û sloganên dilsoziya bi Kurdistanê re tên qêrîn. Ji niha de li Rojhilatê Kurdistanê pêşwaziyek germ ji bo Newrozê heye. Bi vê boneyê bi hezaran kesên li gundê Çeşmîder kombûn, agirê Newrozê pêxistin û Newroz pîroz kirin.
