Mehmet Çevîren (42) ê di sala 2016’an de li navçeya Dêrik a Mêrdînê hate binçavkirin û piştre cezayê muebeta girankirî lê hate birîn û bavê sê zarokan e, du rojan beriya niha li Girtîgeha Girtî ya Beşîriyê bi awayekî bi guman jiyana xwe ji dest da. Cenazeyê Mehmet Çevîren ê ku hate îdîakirin ku xwe kuştiye, piştî kiryarên otopsiyê birin navçeya Dêrikê û hate veşartin. Endamên malbata Çevîren dan zanîn ku mirina wî ne xwekuştin e, diyar kirin ku li ser cil û bergên wî rêçên xwîn û şewatê hebûne û bang kirin ku ev mirina biguman were eşkerekirin. Şaxa Êlihê ya Komeleya Mafên Mirovan (ÎHD) bal kişand ser mirina biguman û diyar kir ku ew ê têkildarî bûyerê serlêdanên hiqûqî bike û pêvajoyê bişopîne.
‘EM BAWER NAKIN KU XWE KUŞTIYE’
Birayê Mehmet Çevîren ê mezin ê Welat Çevîren diyar kir ku piştî mirina biguman li ser cil û bergên ku dane wan rêçên xwîn û şewatê hene û got: ‘’Çima li ser cil bergên însanekî ku xwe darve kiriye rêçên xwîn û şewatê hebin? Melayê ku ew şûştî jî heman tişt anîn ziman û diyar kir ku mirin ne xwekuştin e. Birayê min bi salan li hucreya yekkesî tê ragirtin. Zehmet e ku li hucreyê derfetên xwekuştinê peydabike. Her wiha beriya bûyerê li me geriya û hin tişt xwestin. Însanê ku tiştên xwe dixwaze, hizra roja din dike çima piştî du rojan xwe bikuje?’’
ÎHD: EM Ê BÛYERÊ BIŞOPÎNIN
Şaxa Êlihê ya ÎHD’ê ku bûyerê dişopîne, da zanîn ku mirina berbehs bi guman e û ew li benda belgeyên têkildarî bûyerê ne. Komeleyê anî zima ku wan daxwaza rapora otopsiyê û dîmenên cihê bûyerê kiriye û gotin ku ew ê têkildarî bûyerê raporekê amade bikin.
