Tevî agirbesta 20’ê Tîrmehê, êrîş û dorpêç li bajarê Siwêdayê ya Durziyan ku komên cîhadîst ên girêdayî hikûmeta demkî ya Sûriyê di 13’yê Tîrmehê de êrîşek li wir da dest pê kirin, berdewam dike.
Li gorî Navenda Çavdêriya Mafên Mirovan a Sûriyê (SOHR), hejmara miriyên ji pevçûnên di navbera 13 û 20’ê Tîrmehê de gihîştiye hezar û 653 kesan. Hat ragihandin ku 28 sivîlên din, ku 12 ji wan jin in, ji aliyê komên girêdayî Wezareta Parastin û Karên Hundir ên hikûmeta demkî ya Sûriyê ve hatine qetilkirin.
Bi vî rengî hejmara kuştinên bêdaraz ên ji aliyê komên cîhadîst ên girêdayî HTŞ’ê ve hatine kirin derket 429 kesan (38 jin û 14 zarok). Di nav van qurbaniyan de, ku 20 karmendên nexweşxanê jî di nav de ne, 724 kes hene, ku 166 ji wan sivîl, 21 zarok, 56 jin û du rojnamevan in. 535 kes ji aliyê komên çekdar ên girêdayî hikûmeta Şamê ve di şer de hatine qetilkirin.
Hat ragihandin ku cîhadîstên girêdayî HTŞ’ê êrîşê 30 cihên olî û îbadetxaneyên Durzî kirine. Hat diyar kirin ku Mizgefta Heram a li bajêr jî raste rast bûye hedefa êrîşan.
Rêveberiya demkî ya Sûriyê 28 girtiyên Siwêdayê yên ku di pevçûnên Tîrmehê de hatibûn girtin, berdan. Çavkaniyên xwecihî dibêjin ku ev gav dibe ku beşek ji lihevkirina pevguhertina dîlan di navbera her du aliyan de be.
