Meclisa Sûriya Demokratîk (MSD) der barê “Kongreya diyaloga niştîmanî” ya ku li Şamê hatibû lidarxistin de, daxuyaniyek da.
Daxuyanî wiha ye:
“Meclisa Sûriya Demokratîk (MSD) pêvajoya ‘Kongreya diyaloga niştîmanî’ ya ku di 25’ê Sibata 2025’an de li Şamê hat lidarxistin, şopand.
Berê jî MSD’ê bi daxuyaniyekê rêbaza hilbijartina komîteya amadekar a kongreyê, hişmendiya komîteyê û daxuyaniyên wê red kiribû. Lidarxistina kongreyê jî berdewama rêbaza paşguhkirin û dûrxistinê ye ya ku bi deh salan li qada siyasî ya Sûriyeyê serwer bû.
Tunebûna nûnertiya adilane ya hemû pêkhateyên Sûriyeyê yên neteweyî, civakî û siyasî û lidarxistina lezgîn a kongreyê bêyî ku bingehên zelal jê re werin danîn û garantiyên rastîn hebin, diyar dike ku di vê kongreyê de tu dozên çarenûsî û siberoja Sûriyeyê bi cidî nehatin destgirtin û tenê tedbîreke şeklî bû. Her wiha kongre tu çareseriyên guncaw û hevkariyeke neteweyî di avakirina Sûriyeyê de pêk nayne.
Xwespartina li rêbazên kevin ên binkeftî bi rêya keysbazkirina biryara siyasî û dûrxistina pêkhate û hêzên niştimanî yên aktîv ji hêla desthilata Şamê ve, wê bi xwe re parçebûnê kûrtir bike û firseta serketina pêvajoya veguhêz têk bibe. Diviyabû desthilata Şamê ji rêbazên rejîma desthilat bi dûr keve, diyalogeke cidî, rastîn û giştî ji bo qonaxa veguhêz li dar bixista, da ku hêviyên gelê Sûriyeyê pêk bihata.”
