Meclisa Sûriya Demokratîk (MSD) bi daxuyaniyekê nerazîbûna xwe li hemberî tayînkirina hikumetê ji aliyê desthilata Şamê ve nîşan da.
Di daxuyaniyê de hat diyarkirin ku di hikumeta nû de pirrengiya siyasî û civakî tune ye û tevî ku hin kesayetên teknokrat hatin erkdarkirin jî tê de yekalî serwer e,.
MSD’ê di daxuyaniyê de bal kişand ku di hikumetê de beşdariya rastîn a jinan tune ye ku jin beşa herî berfireh a civakê ne û di salên dawîn de ji ber koçberî, tundî û paşguhkirina siyasî rastî gelek zehmetiyan hatin.
MSD’ê di daxuyaniyê de destnîşan kir ku gaveke wiha wekî gava ber bi çareseriyê ve nayê dîtin, ji ber ku hikumet yekalî ye û ew aliyê serwer jî xwedî îdeolojiyeke zelal e, her wiha hate gotin ku gotinên seranser nikarin rewşê biguherin û her hikumeteke rasteqîn xwe dispêre hevkariya rasteqîn û niştîmanî û tevahî hêzên li ser erdê aktîv in di ber çavan re digire.
Di berdewama daxuyaniyê de hat diyarkirin ku fikra tayînkirina ya ku ji destpêka avakirina komîteya diyalogê ve tê meşandin, diyar dibe ku desthilata Şamê li gorî bingehên sereke yên beşdarî û pirrengiyê tev nagere û ev jî diyar dike ku qonaxeke demkî ya durist ji bo avakirina dewleta Sûriyeyê bi awayekî saxlem, tune ye.
MSD’ê bang li hemû hêzên niştîmanî yên Sûriyeyê kir ku bi hev re ji bo avakirina rêbazeke siyasî ya nû ya li ser bingehên demokrasî û wekheviya hemû pêkhateyan dûrî siyasetên paşguhkirinê, kar bikin.
Di dawiya daxuyaniyê de hat gotin ku pêdiviya Sûriyeyê, li şûna jinûve pêkanîna rêbazên ku hiştine krîz kûrtir bibe û êşên gelê Sûriyeyê mezintir bibin, bi çareseriyên nû heye ku xwe bispêre diyalog û lihevkirinê.
