Pêşnûme “Qanûnê çarçoveyî” ya bi navê “Xurtkirina hevgirtina neteweyî û yekparebûna civakî” ku di çarçoveya Pêvajoya Aştî û Civaka Demokratîk de hatiye amadekirin û wê sibê saet di 10:30’an de pêşkêşî Serokatiya Meclisê bê kirin.
Piştî pêşkêşkirina qanûnê wê rayedarên AKP û MHP’ê saet di 11:00’an de civîna çapemeniyê ya hevpar li dar bixin.
Tê payîn ku Serokê Koma AKP’ê Abdullah Guler, Cîgirê Serokê AKP’ê Efkan Ala û serokwekîlê koman û Serokwekîlên Koma MHP’ê Erkan Akçay, Fîlîzz Kiliç û Fetî Yildiz beşdarî civîna çapemeniyê bibin.
PÊŞNIYARA ÎMZEYÊ YA PARTÎYA DEMÊ WÊ BÊ ÎMZEKIRIN
Her wiha civîna awarte ya Lijneya Rêveberiya Navendî (MYK) ya Partiya Wekhevî û Demokrasiya Gelan (DEM Partî) bi dawî bû.
Civîna ku di bin serokatiya Hevserokên DEM Partiyê Tulay Hatîmogullari û Tuncer Bakirhan ve hat birêvebirin de biryara ku Hevserok, endamên Şandeya Îmraliyê, rêveberiya Koma Meclisê ya DEM Partiyê û endamên Komîsyona Meclisê sibê pêşnûme qanûnê îmze bikin.
Tê payîn ku pêvajoya îmzekirinê ya DEM Partiyê beriya nîvro biqede.
WÊ ROJA ÎNÊ LI KOMÎSYONÊ BÊ NÎQAŞKIRIN
Li gorî agahiyên hatine bidestxistin, tê plankirin ku pêşnûme “qanûna çarçoveyî” roja Înê li Komîsyona Edaletê ya Meclisê bê nîqaşkirin.
Hat destnîşankirin ku piştî nîqaşên li komîsyonê wê pêşnûme bi lez bikeve rojeva Lijneya Giştî û tê armanckirin ku heta dawiya hefteyê bê qebûlkirin.
