Civaka Êzidî ya Şengalê îro bi coş û peroşeke mezin Cejna Çarşema Nîsanê pîroz kir. Civaka Êzidî ku bi hatina biharê re ev bi rojane li seyrangehan hatina biharê pêşwazî dikir, îro jî roja kewna dinyayê bi hemû rengên bîr û baweriya xwe pîroz kir.
Xelkê Şengalê ku di saetên nîvro de li qada pîrozbahiyê ya li Geliyê Kersê kom bû, heya saetên êvarê bi govend û dîlanê cejna xwe pîroz kir.
Di destpêka bernameyê de peyamên ku ji Şengalê û derveyî Şengalê hatine hatin xwendin. Daxwaz hevpar a hemû peyaman pêşxistina tifaq û yekîtiya Êzidiyan, her wiha bilindkirina têkoşîna bidestxistina mafên bingehîn ên civaka Êzidî bûn. Bi taybet peyamên Meclîsa Ruhanî ya Êzidiyan û peyama Endama Konseya Serokatî ya KCK’ê Sozdar Avesta, hêz û moraleke xurt da hemû beşdarên pîrozbahiyê.
Di beşa hunerî ya bernameya Cejna Çarşema Nîsanê de, destpêkê koma zarokan a bi navê Koma Hêviyên Şengalê ku di bin sîwana Stiya Nexşa de xebatên xwe dimeşîne derket ser sehnê. Zarokên Êzidî ku bi cil û bergên Êzdatiyê weke xemlên Nîsanê bûn, bi hebûna xwe rengeke xweş dan pîrozbahiyê.
Piştî koroya zarokan, Kolektîfa Saza Êzî ku bi berhemên xwe yên folklorîk dilê civaka Êzidî geş dike, performansa xwe pêşkeş kir. Kêolektîfa Saza Êzî bi stranên folklorîk ên Çiyayê Şengalê coşa pîrozbahiyê bilind kir.
Pey re, koma muzîkê ya bi navê Koma Bêrîvan ku di bin sîwana Stiya Nexşa de ev demekî ye xebatên xwe dimeşîne, bi stranên xwe yên çandî û her wiha stranên şoreşê yên têkoşîna azadiya jinên Êzidî dilê guhdaran xweş kir.
Di dawiya bernameyê de hunermendê Êzidî Hemîd Qîranî derket ser sehnê. Xelkê Şengalê li ber stranên Hemîd Qîranî govend û dîlan gerandin. Bernameya pîrozbahiya li Geliyê Kersê, li ber stranên Hemîd Qîranî bi coşeke mezin bi dawî bû
