Hevseroka Giştî ya Partiya Demokratîk a Gelan (HDP) Sûltan Ozcan, ji ANF’ê re axivî û diyar kir ku aştî û aramiya mayînde tenê bi misogeriya destûrî ya bo hemwelatiya wekhev, perwerdehiya bi zimanê dayikê, beşdariya demokratîk û azadiyan pêkan e. Sûltan Ozcan, her wiha destnîşan kir ku di vê pêvajoya nû de muxatab girtina Rêber Apo û tevlîkirina wî ya bi bandor di vê pêvajoyê de xwedî rolekî bingehîn e.
‘BI BANGA OCALAN RE VEGUHERÎN PÊK HAT’
Hevseroka Giştî ya HDP’ê Sultan Ozcan, diyar kir ku qanûn ji bo derbasbûna ji atmosfera şer ber bi pêvajoya demokratîk û siyasî ve destpêkek e û got, “Di erdnîgariyekê de ku siyaseta sedan salan a înkarê her dem bi siyaseta ewlehî, şer û tepeserkirinê dihat destgirtin, cara yekem e ku di Meclîsa Millet a Mezin a Tirkiyeyê de bi çarçoveyeke hiqûqî tê destgirtin; ji vê aliyê ve xwedî girîngiyeke dîrokî ye.”
Sûltan Ozcan destnîşan kir ku Qanûna Çarçoveyê ne sererastkirineke berfireh e ku hemû daxwazên gelê Kurd bibersivîne û diyar kir ku armanca bingehîn a qanûnê bi dawî anîna şer û veguherîna pêvajoyê ber bi zemînekî hiqûqî-siyasî ve ye.
Sûltan Ozcan diyar kir ku divê pêvajo bi berçavgirtina nêzîkatiya Rêber Apo bê meşandin û got: “Berpirsiyariya me hemûyan a bingehîn e ku em bi wê giraniya Birêz Ocalan aniye ziman meseleyê fêm bikin. Yanî çi yên li ba wî rawestiyayî bin çi jî yên li dijî wî bin, divê hemû dînamîkên civakî û siyasî binêrin ka bi rastî çi diqewime û ew çi dibêje.”
Sûltan Ozcan diyar kir ku Rêber Apo yek ji muhatabên bingehîn ên pêvajoyê ye û got ku divê rewşa wî ya hiqûqî jî li gorî vê rolê bê sererastkirin. Her wiha Sûltan Ozcan, diyar kir ku piştî bangên Rêber Apo, ji têkoşîna çekdarî ber bi siyaseteke demokratîk ve gav hatine avêtin û ev yek jî destpêka qonaxeke nû ye.
‘REWŞA LI MECLÎSÊ ATMOSFERA NAV CIVAKÊ BI TEMAMÎ NÎŞAN NADE’
Sûltan Ozcan anî ziman ku nîqaşên di dema dîtina Qanûna Çarçoveyê de di Meclisê de qewimîn, nêzîkatiya hemû civakê nîşan nadin û got ku di nav beşên fireh ên civakê de ji bo bidawî anîna şer, mirin çênebin û rakirina atmosfera şer, nêzîkatiyeke erênîtir heye.
Sûltan Ozcan got ku li Tirkiyeyê gelek pirsgirêkên kombûyî hene ku divê bi rêyên demokratîk bêne çareserkirin û got ku bêbaweriya li hember desthilatdarî û tifaqên wê jî van nîqaşan girantir dike.
Sûltan Ozcan da xuyakirin ku nîqaşên di Mecliîsê de di bin bandora zimanê nijadperest, cihêkar û polarîze dima ku berê dihat bikaranîn û got ku dîsa jî nîqaşkirina vê meseleyê ji aliyê beşên cuda ve di Meclîsê de girîng e.
‘OCALAN YEK JI MUXATABÊN KU WÊ ME BIBE ÇARESERIYA DEMOKRATÎK’
Sûltan Ozcan da zanîn ku Rêber Apo yek ji aktorên girîng ên pêvajoya çareserî û veguherîna demokratîk e û wiha dewam kir: “Yek ji muhatabên sereke ku pêvajoyê bibe çareserî û veguherîna demokratîk pêk bîne, Birêz Abdullah Ocalan e. Pêşî têkoşîna çekdarî hat bidawîkirin û piştre rêya têkoşîna mafan bi siyaseta demokratîk hat vekirin.”
‘DIVÊ ŞERT Û MERCÊN XEBATÊ YÊN OCALAN BÊNE BERFIREHKIRIN’
Sûltan Ozcan diyar kir ku divê Rêber Apo wekî sermuzakerevanê pêvajoyê bê qebûlkirin û anî ziman ku li gorî bangên Rêber Apo gav hatine avêtin û xwest ji bo beşdarbûna wî ya bi bandortir di pêvajoyê de şert û mercên pêwîst bêne amadekirin. Hevseroka Giştî ya HDP’ê Sûltan Ozcan got: “Aliyê Kurd û rêxistin, gotiye ku sermuzakerevan Birêz Abdullah Ocalan e. Pêşniyar û bangên ji wî tên têne şopandin. Ji bo vê yekê divê ew bi awayekî bi bandortir tevlî pêvajoyê bibe. Mercên vê divê teqez bêne afirandin.”
Sûltan Ozcan diyar kir ku di Qanûna Çarçoveyê de di statû, şert û mercên jiyan û karkirinê yên Rêber Apo de guherînek nehatiye kirin û got ku di pêvajoya dema pêş de divê mercên karkirinê bêne berfirehkirin û mafê hêviyê misoger bibe.
Her wiha Sûltan Ozcan da zanîn ku wan avakirina mekanîzmayeke ku Rêber Apo jî tê de cih bigire pêşniyar kiriye û got: “Pêwîstiya avakirina mekanîzmayeke ku Birêz Ocalan jî tê de cih digire ji aliyê şandeya me ve hat ragihandin.”
Sûltan Ozcan destnîşan kir ku Rêber Apo ne tenê muhatabekî sembolîk e û got: “Pêwîst e mekanîzmayek were avakirin ku tê de Birêz Ocalan bi awayekî çalak beşdarî pêvajoyê bibe û bikaribe bi beşên cuda yên civakê, rêxistina xwe û dewletê re têkiliyê deyne.”
‘AŞTIYA MAYÎNDE BI NASKIRINA HEMWELATÎBÛNA WEKHEV Û EDALETÊ RE PÊKAN E’
Hevseroka Giştî ya HDP’ê Sûltan Ozcan, anî ziman ku piştî pejirandina Qanûna Çarçoveyê, pêvajoya bingehîn cîbicîkirin û misogerkirina aştiya mayînde ye û got ku bidawîbûna şer bi tenê serê xwe nayê wateya aştiya mayînde û anî ziman ku divê meseleya Kurd bi demokratîkbûna Tirkiyeyê re bi hev re bê destgirtin. Sûltan Ozcan got: “Mayîndebûna aştiyê, bi nasîna hemwelatîbûna wekhev û edaletê re pêkan e. Misogerkirina qanûna perwerdehiya bi zimanê dayikê jî girîng e.”
Sûltan Ozcan da xuyakirin divê edaleta civakî bê avakirin, beşdariya siyasî bê zêdekirin û azadiya raman û îfadeyê bikeve bin misogeriya hiqûqî.
‘GAVA YEKEM LI MECLÎSÊ HAT AVÊTIN, NIHA MARATONEKE MEZIN HEYE’
Sûltan Ozcan diyar kir ku fikarên wan derbarê pêvajoyê de hene lê ev nayê wateya bêhêvîtiyê û wiha dom kir: “Pêwîst e em fikarên xwe bikin hêvî, bi hemû alîgirên demokrasiyê re bibin yek û aştiyeke domdar ava bikin. Ji bo dabînkirina vê aştî û edaletê, hem niha hem jî di siberojê de pêvajoyeke dirêj û zehmet li benda me ye. Çawa ku Birêz Ocalan gotiye, em vê wekî gava yekem a rêya hezar metreyî dinirxînin. Em hebûna vê meseleyê di Meclîsê de girîng dibînin. Em destgirtina wê bi misogeriya hiqûqî û tevlîkirina qada siyasî girîng dibînin. Lê belê têkoşîn bang li me dike.”
