Navenda Ragihandinê ya Hêzên Sûriyeya Demokratîk (QSD) bîlançoya şer û çalakiyên 24 saetên dawîn ên li dijî dewleta Tirk a dagirker û çeteyên wê weşand.
Navenda Ragihandinê ya QSD’ê ev agahî parve kirin:
“Li eniyên cuda çalakiyên rewa yên hêzên me yên li dijî êrişên dewleta Tirk a dagirker û çeteyên wê dewam dikin. Duh (Înê) li eniya Dêr Hafirê çeteyek hat kuştin. Yekîneyên Şehîd Harûn jî li erebeyeke veguhestina çeteyan da û erebe bi temamî rûxiya. Lê hejmara kuştî û birîndaran nehat zanîn.
Şervanên me bersiva êrişa çeteyan a li dijî nuqteyeke hêzên me ya li gundewarê bakurê Bendava Tişrînê da û şer derket. Di şer de 3 çete hatin kuştin û 5 jî birîndar bûn. Tevgera balafirên bê mirov ên bi çek ên dewleta Tirk a dagirker li asîmanê herêmê dewam kir. Di heman demê de jî derdora bendavê bi obîsan bi dijwarî hat topbarankirin. Di encamê de zerar gihiştin milkên şêniyan.
Hêzên me çalakiyeke bibandor li dijî baregeha dagirkeran a li Girê Qereqozaqê yê başûrê Kobanê pêk anî. Di encamê de teqînên mezin li baregehê çêbû ku nêzî 4 saetan dewam kir. Hemwextî wê jî Yekîneyên Şehîd Harûn li heman girî li kombûna hêzên artêşa Tirk a dagirker xist û hejmarek leşker birîndar bûn. Hêzên me çadireke çeteyan rûxand.
Her wiha di çarçoveya çalakiyên rewa yên li dijî êrişên dewleta Tirk a dagirker û çeteyên wê de, Yekîneyên Parastina Jin (YPJ) çalakiyeke lehengane li dijî baregeha artêşa Tirk a dagirker a li Girê Qereqozaxê kir. Di encama çalakiyê de nuqteyeke leşkerî hat rûxandin, 10 çete hatin kuştin, 3 leşkerên artêşa Tirk a dagirker jî di nav de 14 çete birîndar bûn.
Balafirên şer ên dewleta Tirk a dagirker gundê Tîna bombebaran kir. Di encamê de zerarên madî li mal û milkên sivîlan bûn. Di heman demê de gundên Tîna, Cada, Bîr Hiso, Dîkan, Xeseq, Melha, Pira Qereqozaxê û Girê Sêvê yên li başûrê Kobanê bi awayekî ketober bi obîs, moşek, tank û hawanan hatin topbarankirin. Ji ber topbaranê zerarên madî çêbûn.
Balafirên şer ên dewleta Tirk a dagirker duh saet 08.00’an du carî bajarokê Şiyûx bombebaran kir û zerarên madî li milkên şêniyan bûn.
Duh saet 16.40’an hêzên dewleta Tirk a dagirker ji baregeha xwe ya li gundê Hoşeriyê, bi moşekan gundê Torman topbaran kir. Di encama topbaranê de û zerarên madî li mal û milkên şêniyan bû. Balafirên bê mirov ên bi çek jî li herêmê geriya.
Bîlançoya duh a windahiyên çete û dagirkeran wiha ye: 14 çete hatin kuştin, 3 leşkerên dewleta Tirk a dagirker û 16 çete birîndar bûn. Her wiha erebeyeke veguhestina leşkeran hat rûxandin.”
