Ragihandina Azad a Şengalê derbarê hedefgirtin û qetilkirina rojnamevan hevrê Azîz Koyluoglû de, daxuyaniyek nivîskî weşand. Ragihandina Azad a Şengalê di daxuyaniya xwe de bal kişand ser têkoşîna Azîz Koyluoglû û hate gotin: “Weke Ragihandina Azad a Şengalê em jî soz didin ku bibin şagirtên baş yên şehîdên Ragihandina Azad. Em ê ji Şengalê heya Tişrînê, ji Ranyayê heya Zapê li pey heqîqetê, li pey azadiyê û li pey şopên şehîdên Ragihandina Azad bin.”
Di daxuyaniyê de hate gotin ku yek ji pêşengên kevneşopiya Ragihandina Azad, hevrê, mamoste û dildarê welatê azad Azîz Koyluoglû di 27’ê Çileyê de li Ranyayê di êrîşa dewleta Tirk a dagirker de şehîd bû û ev tişt hate gotin: “Piştî şehadeta hevrêyê me Mirad Mîrza, Gulistan Tara, Hêro Bahadîn, Nazim Daştan û Cîhan Bîlgîn, şehadeta hevrê Azîz jî bêguman ji bo me gelekî bi êş û girane, lê di heman demê de hêza bilindkirina şerê azadî û heqîqetê ye.”
Di dewama daxuyaniyê de ev tişt hatin gotin: “Hevrê Azîz weke yek ji derwêşên heqîqetê 30 salên xwe bi ked, fedekarî, bawerî, îdia û têkoşîneke bê sînor jiyan kir. Ji şagirtiya Apê Mûsa û Gurbetellî Ersozan, ber bi mamosteyiya heqîqetê roj bi roj meşiya. Ev meş geh li çiyayên asê yên Kurdistanê, geh li deşt û newalan geh li çol û çolistanê bû. Di nav zeman û mekaneke bê sînor de xwe tevlî çemê heqîqetê kir û pê re herikî. Wî li çiyayên Kurdistanê bedewiya şerê azadî û heqîqetê jî dît, ferman-talan û hovitiya li ser welatê xwe jî. Loma zimanê wî, pênûsa wî, fikrê wî xurt û zelal bû.
Bi şehadeta Hevrê Azîz re me careke din dît ku barekî çawa li ser pişta Ragihandina Azad e. Me carekî din fêm kir ku şerê heqîqetê bê bedel nayê meşandin. Me carekî din dît ku dijminê me çiqas hove, çiqas dijminê heqîqetê ye. Hêz û baweriya Rosîda, Mirad, Gulistan, Hêro, Nazim, Cîhan û Azîzan êdî bi çiyayên bilind re, bi deryayê kûr yên heqîqetê re, bi gel û welat re bûye yek. Em ji hovîtiya dijmin fêm dikin ku rojên azad çiqasî nêzîke. Weke Ragihandina Azad a Şengalê em jî soz didin ku bibin şagirtên baş yên şehîdên Ragihandina Azad. Em ê ji Şengalê heya Tişrînê, ji Ranyayê heya Zapê li pey heqîqetê, li pey azadiyê û li pey şopên şehîdên Ragihandina Azad bin.”
