Wezareta Karên Derve ya Dewletên Yekbûyî yên Emerîkayê (DYE) Komîserê berê yê Yekîtiya Ewropayê Thierry Breton jî di nav de vîze li 5 kesayetên Ewropî qedexe kir. Rêveberiya DYE’yê her pênc kes bi îdîaya ku zext li şîrketên teknolojiyê yên Emerîkî kirine û bi vî rengî nêrînên Emerîkayê sansur kirine, sûcdar kir.
Wezîrê Karên Derve yê DYE’yê Marco Rubio diyar kir ku kesên vîze li wan hatiye qedexekirin li dijî platformên Emerîkî bi rengekî organîzeyî karê zextê meşandine û got, “Ev aktîvîstên radîkal û rêxistinên civakî yên sivîl ên bûne amûr, bi navê dewletên biyanî polîtîkayên sansurê mezin kirin. Her carê qisekerên Emerîkî û şîrketên Emerîkî bûn hedef.”
Ev gava rêveberiya DYE’yê weke xeleka dawî ya êrişên li ser guhertinên Yekîtiya Ewropayê yên li ser qada dîjîtal tê dîtin.
Kesayetên ku vîze li wan hate qedexekirin ev in: CEO yê Centre for Countering Digital Hate Imran Ahmed, Rêveberên HateAid a ji Elmanyayê Josephine Ballon û Anna-Lena von Hodenberg, rêvebera Global Disinformation Index Clare Melford û Komîserê berê yê Yekîtiya Ewropayê Thierry Breton.
Breton nerazîbûn nîşanî biryarê da. Global Disinformation Index jî biryara DYE’yê weke “Bê exlaqî, bêhiqûqî û li dijî Emerîkayê” pênase kir û ev yek weke êrişeke otorîter a li ser azadiya fikrî nirxand.
