Rêveberiya Xweseriya Demokratîk a Herêma Bakur û Rojhilatê Sûriyeyê bi boneya 8’ê Adarê Roja Jinan a Cîhanê daxuyaniyek da û îşaret bi sembolîkbûna vê rojê kir û got ev roj hêviyên jinan nîşan dide û destkeftiyên wan xurt dike.
Rêveberiya Xweser diyar kir ku şoreşa jinan li Bakur û Rojhilatê Sûriyeyê gaveke dîrokî ya girîng e û diyar kir ku jin bi awayekî çalak beşdarî aliyên siyasî û leşkerî bûn û li hember zehmetiyên mezin sekinîn; ji DAÎŞ’ê bigire heta bi dagirkeriya Tirk.
Rêveberiya Xweser di daxuyaniya xwe de anî ziman ku tevî hewldanên bidûrxistina jinan piştî hilweşîna rejîma Baas’ê, jinên li Sûriyeyê di oxira bidestxistina mafên xwe de pêşengtiya têkoşînê dikin.
Rêveberiya Xweser ev roj li tevahî jinên Sûriyeyî bi hemû pêkhate û rengên xwe pîroz kir û got ew di oxira pêkanîna rêgezên azadî û edaletê pabendî domandina xebatê ye.
Rêveberiya Xweser piştgiriya xwe ji bo jinên li eniyên şer nîşan da û hêvî kir ku 8’ê Adarê bibe roja azadî û edaletê û sembola têkoşîna li dijî tevahî şêweyên zordariyê.
Di dawiyê de Rêveberiya Xweser 8’ê Adarê li tevahî jinên cîhanê pîroz kir û got ew sembola aştî û azadiyê ne û ji bo jinên li Bakur û Rojhilatê Sûriyeyê hêviya serkeftinê xwest.
