Rêveberiya Xweseriya Demokratîk a Herêma Bakur û Rojhilatê Sûriyeyê bi boneya salvegera dagirkirina Serêkaniyê û Girê Spî daxuyaniyeke nivîskî da. Di daxuyaniyê de wiha tê gotin:
“Di sala 2019`an de dewleta Tirk bi beşdariya komên çete yên girêdayî wê êrişeke berfireh li dijî bajarê Serêkaniyê û Girê Spî pêk anî û aramî û ewlehiya herêmên me yên ewle kir hedef. Di êrişên xwe de hemû cureyên çekan û çekên qedexekirî bi kar anîn û ev yek di nava bêdengiyeke navneteweyî ya şermok de li hember gelê me hate kirin.
Di encama êrişê de bi sed hezeran sivîl koçber bûn, binpêkirinên mezin ên mafên mirovan wekî kuştin, revandin, talankirin û hilweşandina binesaziyê hatin kirin. Ev yek di çarçoveya siyaseta sîstematîk de ku armanca wê qirkirina etnîk, guhertina demografiya wan herêman bû, pêk hat. Heta roja îro Serêkaniyê û Girê Spî di bin dagirkeriyê de ne û şêniyên wan ji ber tunebûna ewlehî û berdewamiya binpêkirinên rojane li dijî sivîlan, zehmetiyan dikişînin.
Em Rêveberiya Xweseriya Demokratîk a Herêma Bakur û Rojhilatê Sûriyeyê tekez dikin ku dewleta Tirk a dagirker û komên girêdayî wê gefeke rasterast li ser yekparebûna xaka Sûriye û aramiya wê çêdikin û rizgarkirina herêmên dagirkirî û vegera şêniyên wê bi awayekî birûmet û ewle erkeke nîştimanî û mirovî ye û nabe ku were paşguhkirin.
Bi vê boneyê em bi rêzdarî şehîdên leheng ên QSD`ê, YPJ`ê û gelên xwe yên sivîl ku bi lehengî li hember êrişên dewleta Tirk û komên girêdayî wê sekinîn û bi xwîna xwe ya pîroz parastina ax û rûmeta xwe kir, bi bîr tînin.”
Daxuyaniyê bi vî rengî dewam kir: “Her wiha em diyar dikin ku divê xebatên nîştimanî yên Sûriyeyê bi pêkhateyên wê cuda û hêzên wê yên siyasî û civakî bibin yek da ku dagirkeriya Tirkiyeyê bi dawî bikin, projeyên parçekirinê rawestîne, bi hev re ji bo Sûriyeke demokratîk, yekgirtî ku edalet, azadî û wekhevî di nava gelê wê de serdest be, bixebitin.
Îro Sûriye piştî hilweşandina rejîma Baasê ku bi dehan salan bi zordarî û zilmê welat bi rê ve bir, dikeve qonaxeke nû. Gelê Sûriyeyê hîn jî li benda gavên cidî ne ber bi vegera ewle û birûmet li malên xwe û vegerandina mafê xwe yê jiyana azad û birûmet li ser axa xwe.
Gelê Sûriyeyê ji bo bidestxistina armancên şoreşa azadî, edalet û rûmeta mirovan li dijî neheqî û zordariyê tê koşiyan. Erka hemû hêzên niştîmanî û siyasî ye ku hêzên xwe bikin yek û yekgirtî bin da ku hêvî û xwestekên vî gelî pêk bînin û berdêlên mezin ên ku ji bo avakirina Sûriyeke nû, azad û demokratîk dane, biparêzin.
Em Rêveberiya Xweseriya Demokratîk soza xwe ji gel û hêzên xwe re nû dikin ku têkoşîna xwe bi hemû rêbazên rewa heta bidawîkirina dagirkirinê û vegera koçberan li warê wan, avakirina pêşerojeke birûmet, azad û edalet ji hemû gelê Sûriyeyê re nû dikin.”
