Bi hezaran şêniyên Kantona Firatê bi hemû pêkhateyên xwe daketin kolanan û ber bi Qada Jina Azad ve meşiyan. Ev meş bi armanca nîşandana piştgiriya bi QSD’ê re ye ku QSD’ê ne tenê nûnertiya Kurdan, di heman demê de nûnertiya hemû gelên herêmê dike, hate lidarxistin. Ev meş her wiha ji bo gotinên cudakar ên li dijî QSD’ê weke bersivek xurt derket pêş.
Di meşê de alên QSD`ê û wêneyên Rêber Apo hatin hildan û bênavber dirûşmeyên “Bijî Berxwedana QSD`ê” û “Bê Serok Jiyan Nabe” hatin berzkirin.
Jinên ku tevlî meşê bûn, ji ANF’ê re axivîn û diyar kirin ku gel û QSD`ê li Bendava Tişrînê û li Kobanê destan nivîsandin û bi ser ketin.
‘EM JI GEFÊN WAN NATIRSIN’
Komîteya Jin a Şaredariya bajarê Şêranê Zêneb Nesan, da zanîn ku ew ê heta kêliya dawî li kêleka zarokên xwe bin û got, “Em ji bo hêza xwe li kolanê ne. QSD`ê parastian ax û welatê xwe kir. Wan li hemberî hemû hêzên ku destdirêjî li ser vî welatî kirin e, rabûn û axa xwe parastin. Em weke dayîk soz didin ku em ê li pişta hêza xwe bin û bi hêza xwe bighêjin serketinê. QSD`ê ji bo me jiyane. Ji ber ku wan jiyan ji bo me ava kir. Em ê rojane li qadan bin. Em êdî ji gefan natirsin û hêza me heye. Hêza me vaye DAÎŞ têk birin.”
`JI 7 SALÎ HETA 70 SALÎ EM QSD`Ê NE`
Dayîka şehîd Karkir Hewa Berewad, anî ziman ku çeteyên DAÎŞ’ê li Kobanê û yên dewleta Tirk a dagirker li Bendava Tişrînê di encama berxwedana QSD’ê de têk çûne û wiha axivî, “QSD`ê şêrên me ne. Îro em piştgiriyê didin wan. Ew hêza me ne. Li Bendava Tişrînê destan bi saya şervanên me pêk hat. Heta dawiyê em ê ji 7 salî heta 70`ê salî li pişt hêzên xwe bin. Em ê mil bi mil bi şervanên xwe re destketiyên xwe biparêzin.”
‘LI BENDAVA TIŞRÎNÊ GEL Û QSD’Ê HEVÛDÛ TEMAM KIRIN’
Endama Meclîsa Malbatên Şehîdan Ayşe Mihemed Şêx jî wiha got, “Gel û QSD’ê mîna goşt û neynikê bi hev ve ne. Ji hev nayê qutkirin. Em QSD’ê ne û QSD’ê jî zarokên me ne. Hikûmeta Sûriye ya Veguhêz dibêje ku QSD`ê xîtaba Kurdan nake. Em jî dibêjin ku em hemû QSD`ê ne, ew hebûna me ne û zarokên vî gelî ne. Heta dawiyê jî em ê li pey hêza xwe bin. Çawa ku me li Bendava Tişrînê piştgiriya hêza xwe kir, em ê li her deverê piştgirî bikin. Li Bendava Tişrînê gel û QSD`ê hevûdû temam kirin û biser ketin.”
