Rafael Grossi beriya hevdîtina krîtîk a di navbera Emerîka û Îranê ku roja Şemiyê li Romayê bi navbeynkariya Omanê bên lidarxistin, daxuyanî da.
AIEA ya ku navenda wê li Viyanayê ye, erka wê ew e ku bernameya nukleerî ya Îranê bê bi armancên aştiyane re sînordare yan na, kontrol dike.
Ev demek dirêje di serî de Emerîka û Îsraîl, welatên rojavayî Îranê bi çêkirina çekên nukleerî tawanbar dikin, Tehran van îdiayan red dike û radigihîne ku armanca bernameya wê ji bo hilberîna enerjiya sivîl e.
Rafael Grossi yê ku serdana Tehranê kir got: “Em bi van muzekereyên gîring re di qonaxeke pir girîng de ne.” Grossi di daxuyaniya da çapemeniya Îranê de ev tişt anî ziman: “Em dizanin ku dema me pir kêm e. Ji bo hêsankirina vê pêvajoyê ez li vir im.”
Grossi li Tehranê bi Serokê Rêxistina Enerjiya Atomê ya Îranê Mihemed Îslamî re hevdîtin pêk anî. Hûrgiliyên hevdîtinê bi raya giştî re nehatin parvekirin. Rojnameya Şerq a alîgirê reformanê ye ev serdan wek “qonaxeke nû ya hesas a dîplomasiya Îranê” bi nav kir.
Grossi di hevpeyvîna rojnameya Le Monde ya Fransî de diyar kir ku Îran “gelekî” nêzîkî bidestxistina çeka atomî ye, lê hîn jî “hinek mesafe” heye.”
Wezîrê Karên Derve Abbas Arakçî yê ku li ser navê Îranê muzakereyan dimeşîne anî ziman ku wan bi Grossi re “hevdîtineke kêrhatî” pêk anîne.
Arakçî daxuyand ku AIEA dikare di demên pêş de ji bo çareseriya aştiyane ya peymanê roleke girîng bilîze.
Ji aliyê din ve sermuzakerevanê Emerîkayê Steve Witkoff ragihand ku divê Îran çalakiyên xwe yên dewlemendkirina uranyumê rawestîne û ji holê rake. Tehranê ev daxwaz weke “xeta sor” bi nav kir. Îranê bi eşkereyî destnîşan kir ku ew ê bi temamî rawestandina çalakiyên xwe yên atomî qebûl neke.
