Ji ber êrîşên dewleta Tirk a dagirker ên li ser herêma Efrînê, gel neçar ma koçber bibe. Ev koçberî dikeve sala xwe ya 8’an. Ev gelê berxwedêr rûxmî vê êş û zehmetiyê li ber xwe didin û serî ji dijmin re natewînin. Piştî ku ev gelê berxwedêr ji Efrîn koçber bûn, berê xwe dan Herêma Şehbayê. Ew cihê hişk û zûha wergerandin cihekî bi ruh û xwezayî, li wir carek din jiyana xwe bi rêxistin kirin. Lê kêfa dijmin nehat û car din ew ji herêma Şehbayê hatin koçberkirin. Berxwedanî û têkoşîn bû sedem ku ew qas hewildanên dijimin vala derbikevin.
Têkildarî koçberên ji Efrînê têkildarî zehmetiyên ku di dema koçberiya ji Efrîn heta Şehba û ji Şehbayê jî heta Reqayê jiyan kirine, ji ANF’ê re axivîn.
Welatiyê bi navê Elî Pîrî li ser koçberiya xwe ya ji Efrîn heta Şehbayê, ev tişt: “Di sala 2018’an dewleta Tirk a dagirker û çeteyên wê di şevekê de bi balafirên şer û yên bi çek, bi tevahî teknîka xwe ya giran êrîşî Efrînê kir. Dewleta Tirk a dagirker ev êrîş bi armanca ku carek din dewleta Osmaniyan a desthilatdar vejîn bike û xaka me dagir dike, pêk anî. Li Efrînê 72 balafirên şer li ezman bûn. Di wê demê de bajar û bajarokek Efrîn nebû ku êrîş li ser nehat kirin. Dewleta Tirk a dagirker êrîşên xwe li ser gel pêk anî. Ji derveyî zarok û sivîlan ti kes din li Efrînê nebû. Komkujyên mezin li ser zarok û jinan hatin kirin. Bi awayek hovane êrîş kir û bi hezaran kes qetil kirin. Li kêleka vê yekê jî gelê me yê berxwedêr 58 rojan li Efrînê berxwedanî kirin û xaka xwe bi hêsanî teslîmî dijmin nekirin.”
Welatiya bi navê Fatma Reşîd a ji Navçeya Bilbilê ya bajarê Efrînê, ji me re behsa koçberiya ku tê re derbas bûyî kir û wiha got: “Dema em li Efrînê bûn, jiyana me xweş û biewle bû. Lê mixabin piştî ku dewleta Tirk a dagiker êrîşên xwe yên hovane li ser me pêk anî, bi awayek nemirovî zarok, jin, kal û pîrên me qetil kirin. Piştî berxedaniya 58 rojan em neçar man ji xaka xwe dûr bikevin. Me mal, milk û erdê xwe li pişt xwe hişt û me berê xwe da herêma Şehbayê. Her wiha me jiyanek din li Şehba ji bo xwe ava kir da ku em car din vegerin xaka xwe Efrîn.
Dema em hatin Şehba me tim digot em ê Şehba bikin Efrîna biçûk ji bo zarokên xwe. Lê car din dijmin êrîşî me kir û em di seatekê de ji Şehba derxistin û em ber bi Herêmên Rêveberiya Xweser ve hatin. Ji ber hovîtiya dijmin em du caran koçber bûn. Em sivîl in yanî di milê hiqûqî de nabe ku êşkence û koçberî li ser sivîlan were ferzkirin, lê dewleta Tirk a dagirker me du caran ji warên me koç kir û em bê mal û war hiştin. Di heman demê de di dema koçberiyê de kuştin, revandin û gelek tiştên qirêj ji aliyê çeteyên dewleta Tirk a dagirker ve li ser gelê sivîl hatin kirin. Dewleta Tirk a dagirker vê yekê didomîne û tiştên qirêj ên di derheqê gelê Kurd de roj bi roj zêdetir dike. Li beramberî vê yekê wê gelê Kurd her tim têkoşîn bikin û wê berxwedaniya wan bibe çeka herî giran li hember dijmin.”
Ferîde Ehmed ku ew jî yek ji koçberên Herêma Efrîn-Şehba ye, destnîşan kir ku şerê di sala 2018’an de li ser wan pêk hat şerekî li dijî mirovahiyê bû û wiha got: “Em di malên xwe de li Efrînê bi ewle bûn. Lê belê dijmin êrîşî me kir û me ji malên me û axa me dûr xist. Her wiha bi sedan jin û zarok kuştin û revandin, lê kes ji dewletên navnetewî dengê xwe jî bilind nekir û ev şer ranewestand. Lê rûxmî wê jî em hîn li ser hêviya xwe bûn û em koçberî Şehba bûn. Me got raste niha Efrîna me ya rengîn, di destê dijmin de ye lê em ê li Şehbayê jiyanek nû ji xwe re ava bikin. Me dest bi avakirina mal û rêxistinên li Şehba kir, lê car din dijin êrîşî me kir û em ji Şehba jî derxistin. Di rê de dema em koçberî herêmên Rêveberiya Xweser dibûn, çeteyên Artêşa Azad û çeteyên dewleta Tirk a dagirker her tiştê qirêj bi ser gelê me anî.”
