Hatina Rêber Apo ya Rojava di sala 1979’an de pêş ket, ev ji bo gelê Kurd ronahiya hêviyeke nû çêdike. Ev rewş gelek kes ji bo têkoşîna azadiya gelê xwe teşwîq dike. Hevî Îbrahîm Hesen a 56 salî yek ji wan kesan e. Hevî Îbrahîm ku li Qamişloyê ji dayik bû û mezin bû, di salên 1990’î de Têkoşîna Azadiya Kurd nas dike û tevlî xebatên rêxistinkirina gel dibe. Ji bo belavkirina fikrên Rêber Apo derî bi derî digere. Hevî Îbrahîm qala wan rojan kir û wiha got: “Me girtin da ber çavê xwe, lê gav paşde neavêt. Em tevî zilm û zextên rejîma Sûriyeyê di parastina hebûna xwe de bi israr bûn. Me bawer dikir ku wê fikrên Rêber Apo gelê me ronî bike.”
SOZ DIDE BIRAYÊ XWE YÊ ŞEHÎD
Birayê wê Reşît Îbrahîm Hesen di şîna xalê xwe Xurşîd Sileyman (Şahîn) ku 1990’î de şehîd bû, soza tevlîbûna li Têkoşîna Azadiya Kurd dide. Ev dilsozî û biryardariya malbatê ya ji bo têkoşînê xurt dike. Lê piştî ku Reşît Îbrahîm Hesen di sala 1996’an de tevlî karwanên şehîdan dibe, ev yek bandorekî kûr di jiyana Hêvî de dihêle û biryardariya xwe ya di têkoşîna azadiyê de mezin dike. Tê bîra wê ku dema xatir ji birayê xwe dixwaze wiha gotiye, “Bila çavê te li paş nemîne, deriyê me ji bo hevalan heta dawî vekiriye, em ê bidin pey têkoşîna te.”
LI DIJÎ ZILMA REJÎMA BAASÊ TÊDIKOŞE
Hêvî Îbrahîm Hesen wekî kesek dilsozê nasname, ziman û çanda xwe ya Kurd bi gelek zehmetî û zextan re rû bi rû dimîne. Di dema rejîma Baasê de hem bi ew hem jî malbata wê bi awayekî giran ji zilm û zexta rejîmê bandor dibin. Dema rêveberiya Baasê bi taybet polîtîkayên tinehesibandin û biçûkxistina nasnameya Kurd dimeşîne, di aliyê aboriyê de jî gelê Kurd dorpêç dike. Hêvî Îbrahîm Hesen ji ber pirsgirêkên aborî neçar dimîne koçî Şamê bike, 9 salan li vir dijî.
Hêvî Îbrahîm Hesen dema li Şamê bû berpirsyarî û erkên xwe yên welatparêziyê jî bi cih tîne û di vê demê de bi beşdarbûna xwe ya li çalakiyên girseyî yên cûrbecûr tevkarî li têkoşîna parastina mafên Kurdan dike. Hişmendiya welatparêziyê her tim hem ji bo xwe û hem jî ji bo malbata xwe esas digire û tevî zehmetiyên dibîne jî baweriya xwe winda nake. Helwesta Hêvî Îbrahîm Hesen a di vê demê de ji bo Kurdên li Şamê dibe mînak.
VEGERA WARÊ XWE
Destpêkirina Şoreşa Rojava ji bo Hêvî dibe xala werçerxê. Ev pêvajo ji bo gelê Kurd di xwe rêvebirin û lêgerîna azadiyê de firsendekî mezin pêşkêş dike. Hêvî Îbrahîm Hesen kurê wê yê ku ji bo rejîma Sûriyeyê 4 salan ji neçarî leşkeriyê kir, ji vê xizmeta bi darê zorê rizgar dike û berê xwe dide bajarê Qamişloyê.
Hêvî Îbrahîm Hesen ku dema qala Şoreşa Rojava dike çavên wê diteyisin wiha qala heyecana xwe ya bi şoreşê re dike: “Dema ku min bihîst şoreş çêbûye, min ewil dest bi amadekariyên vegera Qamişloyê kir. Rejîma Baasê kurê min bi zorê biribû leşkeriyê, çar salan leşkeriyê kiribû. Divê min bi awayek wî ji vî zilmî rizgar kiriba û vegeriyana Qamişloyê. Xeyalên me yên bi salan pêk hatibûn û ez ê vegeriyama Qamişloya ku lû jidayik bûm û mezin bûm.”
ŞERÊ GEL Ê ŞOREŞGERÎ LI NAVA GEL BELAV DIKE
Bi Şoreşa Rojava re li Bakur û Rojhilatê Sûriyeyê gelek sazî û rêxistin hatin avakirin. Di vê pêvajoyê de Hêvî Îbrahîm Hesen girêdayî îdialên xwe yên şoreşgerî ma û rolek çalak di avakirin û çalakbûna van saziyan de girt. Hêvî ya ku bi daxwaza tevkariya têkoşîna azadiyê ya gelê xwe girîngî pê da ku di her qonaxa pêvajoya şoreşê de cih bigire, li gund û bajaran pêşengî ji hewldanên parastina nasname û destketiyên xwe kir. Di vê têkoşînê de bû yek ji kevirên bingehîn ên serketina Şoreşa Rojava. Hêvî Îbrahîm Hesen ku tevkarî li piştevaniya civakî û têgihiştina parastina cewherî kir ku bingehên Şoreşa Rojava ne, di sê salên dawiyê de bi cihgirtina li nava Hêzên Parastina Cewherî (HPC) xizmetê ji şoreşê re dike.
LI TIŞRÎNÊ BIRYARA RAKIRINA ALA SERKETINÊ
Hêvî Îbrahîm Hesen ku ji malbata xwe 16 şehîd da, yek ji dayikên ku di 17’ê Çileyê de tevlî berxwedana Bendava Tişrînê bûye ye. Hêvî Îbrahîm Hesen ku ji bo parastina welat, av û enerjiya xwe dest bi tevgerê kir wiha dibêje, “Îro ne roja rûniştina li malê ye. Gelê me ji mirinê natirse. Mirinê dide ber çavên xwe, lê dagirkirina Tişrînê nade ber çavê xwe. Li xaka Bakur û Rojhilatê Sûriyeyê Şerê Gel ê Şoreşgerî tê jiyîn. Yên ku li ber xwe didin gel in. Em ê bi hev re serketinê bi dest bixin.”
Hêvî Îbrahîm Hesen îşaret bi yekîtiya gelan kir û wiha got: “Em bi Kurd, Ermen, Suryan, Ereb û tevahî gelên din re diçin parastina bendava xwe. Bendava Tişrînê ya me ye. Em ê şehadetê bidin ber çavên xwe, lê destûrê nedin dagirkirina Bendava Tişrînê. Tişrîn rûmeta me ye, em ê xwedî li rûmeta xwe derkevin.”
