TEV-ÇAND’ê di navbera 10 û 11’ê Kanûnê de li Ewropayê 8’emîn konferansa xwe lidar xist. Di konferansa ku nêzî 80 delege beşdar bûn de, xebatên du salên dawî hatin nirxandin û biryarên girîng ji bo xebatê hatin girtin.
Di konferansê de li gel rojevên sereke yên çand û hunerê, êrîşên li ser Rojavayê Kurdistanê û herêmên Bakur û Rojhilatê Sûriyeyê hatin destgirtin û banga hevgirtinê hat kirin.
Konferans bi xwendina encamnameyê bidawî bû.
Di encamnameya konferansa TEV-ÇAND’ê de ev tişt hatin gotin:
“Îro li Rojhilata navîn geşedanên ku tên jiyîn asta şerê cîhanê yê sêyemîn bi her awayî radixe ber çavê me. Her serdem hundirê xwe de resentiyên kêliyê diafirîne. Ew resentî jî xwezaya xwe de sekn, helwest û tevlîbûnên bi wî awayî li hemû derdoran ferz dike. Di Rojava de şer û êrîşên encama polîtîkayên sed salan e ku li hemberê gelê Kurd tê meşandin û polîtîkayên qirkirinê bi destê eniyên çete, lihevkar û eniya faşîst ya ku Komara Tirkiyê pêşengiyê vê dike, xistine meriyetê.
Felsefeya Rêber Apo li Rojhilata Navîn û Cîhanê ji bo gelan hêvî ye û ronakbiriyê pêşdixe. Derdorên li dijî modernîteya kapîtalîst tên ba hev û îro di paradîgmaya Rêber Apo ya modernîteya demokratîk de xelas bûn û azadiya gelan dibînin. Ji ber ku wekî xelasiyê li hemû cîhanê bandor bûye, bi erêkirina hêzên navneteweyî, tecrît û êrîşkariyek dermirovane li ser Serokatî tê meşandin û hewldanên komkujiyê yên li ser prototîpa neteweya demokratîk a li Rojava encamê wê ne. Ji ber vê hat xwestin ku bi komploya 9’ê Cotmehê Rêber Apo tasfîye bibe û îro dixwazin pergala Apo’yî tasfîye bikin. Her wiha gelê me yê Rojava bi dehan salan di bin faşîzma rejîma Baasê hate perçikandin û îro jî piştî hilweşandina dîktatoriya Baasê ve bi pêşengtiya faşîzma Komara Tirkiye ve bi destê eniyên çete û lihevakar re di bin xetereya komkujiyê de tên hiştin.
Di kêliyek ewqas dîrokî de her eniyên ku xwe ji nirxên mirovahiyê re girê didin, pêwîste li her qadê nirxên azadiyê biparêzin û pêşengtiya wê bikin. Ew jî bi xwedî derketina li pêngava ‘ji Rêber Apo re Azadî, ji pirsgirêka Kurd re çareserî’ û parastina desketiyên Rojava re pêkan e. Tu wijdan, tu exlaq û tu nirx pêvajoyek bi vî awayî ji rêzê mayînê qebul nake.
Em jî weke TEV-ÇAND’ê ji bo berpirsyariyên xwe yên demî re bersivek rast bidin, di nav dahurandin û nirxandinên kûr yên navxweyî dikin. Bi vê mebestê bi dirûşmeya ’Ji bo Azadiyê Hunera Azad’ du roj em li hev civiyan. Ji ber nebesiyên tevlîbûna vê pêvajoyê her hevalek ku beşdar bû, rexnedayîna xwe ya ji bo pêvajoyê da û biryardariya xwe raber kir.
Çand û hunera Kurdî bi hezaran salan e ku bi awazên xwe berxwedêriyê vedibêje, bi govendên xwe şerê xwe dihunîne, bi dengbêjiya xwe dîrokê re malovaniyê dike û bi jiyana xwe nirxên hebûna mirovahiyê bilêv dike. Heman Çand û huner bi ew mîsyona xwe îro dîsa bi lehengên demî re dibe yek û welatê xwe re hezkiriyên xwe ji axa xwe re diqîre. Nirxên parastina hebûna xwe wekî Serokatiya xwe dibîne û armanca bidestxistina Azadiya Rêber Apo ya fîzîkî jî bingeha çanda xwe de bi cîh dike. Û her wiha her cûre êrîşkariyên li ser Rojava wekî êrîşa li ser mirovahiyê pênase dike.
Ji ber vê yekê di encama Konferansa me ya 8’emîn de em ji hemû derdoran re raber dikin. Em ferqa bendewariyên dîrokî, gelê me û rêxistinên me de ne. Em dizanin ku pêşengtiyek rast ya aliyê hunerî dikare hemû civakê re bibe bersivek rast û teqez jî ya ku wê pêk were, dê ev be.
Bi vê boneyê em konferansa xwe diyarî têkoşîna Rêber Apo ya bi berxwedanek dîrokî ku li imraliyê mirovahiyê diparêze û berxwedana Rojava ya ku îro li pêşberî hemû erîşkariyên cîhanê berxwe dide, dikin. Ya ku teqez me li pêşberî dîrokê şanaz bihêle sekna xwedîderketina berxwedana Rêber Apo û berxwedana Rojava ye. Bi vîn û hêza ku me ji encama Konferansê derxistî, em bang li hemû derdorên hunermend, hunersaz, rewşenbîr, ronakbir û kesên azadîxwaz dikin ku li derdora berxwedana Rêber Apo û berxwedana Rojava bibin xelek. Em bi ruhê seferberiyê li her qada ku em lê ne tevlî xebatan bibin û li her derî çalakî lidar bixin. Divê em baş bizanibin ku Parastina Rojava parastina Kurdistanê ye… û îro di şexsê Rojava de Kurdbûn di bin şurê qirkirinê de ye.
Li çar aliyê Kurdistanê heya hemû erdnigariya ku Kurd û dostên wê lê dijîn, divê di hunera herî dîrokî de û bi çanda berxwedêrên serdemê ku li çiyayan de bûne mînak biherikin û wê hewldanên komkujiyê bi piştgiriyê vala derxin û bi azadiya fîzîkî ya Rêber Apo re serketinê tacîdar bikin. Parastina Rojava parastina tevahî Kurdistanê ye. Azadiya Serokatî, gihîştina nirxên Azadiyê ye…”
