Hevseroka Giştî ya Partiya Wekhevî û Demokrasiyê ya Gelan (DEM Partî) Tulay Hatîmogûllari, di çarçoveya “Hevdîtinên Aştî û Civaka Demokratîk” de li Edeneyê bi welatiyan re civiya. Hevdîtin, li Navenda Yaşar Kemal hat lidarxistin. Dayikên Aştiyê, partiyên siyasî, rêxistinên civaka sivîl û komeleyên herêmî û gelek kes tev li bûn. Hevdîtin bi rêzgirtinê dest pê kir û piştre sînevîzyona ku “Hevdîtinên Aştî û Civaka Demokratîk” vedibêje hate pêşandan.
‘GELÊ KURD ÊDÎ LI TEVAHIYA CÎHANÊ WEKE GELÊ BERXWEDÊR HAT NASKIRIN’
Piştre jî Tulay Hatîmogûllari axivî. Tulay Hatîmogûllari, bedelên Dayikên Aştiyê û gelê Kurd dane bi bîr xist, spasiya Dayikên Aştiyê kir ku tevî ewqas êşan jî hêj daxwaza aştiyê dikin û got hevdîtin û pêvajoya îro berhema têkoşîna wan e.
Bi domdarî Tulay Hatîmogûllari, bal kişand ser pêvajoyê û got Banga Aştî û Civaka Demokratîk a Rêber Apo ji hêla pêvajoyê ve gelek girîng e. Tulay Hatîmogûllari, wiha domand: “Ez jî di Şandeya Îmraliyê de bûm. Di hevdîtinê de birêz Ocalan, sedema bangê, girîngiya wê ya dîrokî vegot û xwest bi tevahiya civakê re bê parvekirin û xwedî lê derkevin. Serfiraz im ku min şahidiya vê kêliya dîrokî kir. Piştre jî PKK’ê kongre kir û biryar da. Gotin ku ne ji bo bidawîkirina hin tiştan lê berevajî vê, ji bo têkoşîna demokratîk li ser zemîna yasayî û hiqûqî were qebûlkirin, girîngiya têkoşînê vegotin. Yên heta niha digotin ‘Kurd tune ne, Kurdî tune ye, tenê Tirk hene’ ji ber vê têkoşînê neçar man ku asta têkoşîna demokratîk qebûl bikin. Gelê Kurd êdî li tevahiya cîhanê weke gelê berxwedanê hat naskirin.”
‘PÊVAJOYA DEMOKRATÎKBÛNÊ ŞERT E’
Bi domdarî Tulay Hatîmogûllari gotina Rêber Apo a “Niha dora çareserkirina pirsgirêka Kurd a li ser zemîna siyasî û hiqûqî ye” bi bîr xist û wiha pê de çû: “Heta Tirkiye demokratîk nebe ne Kurd, ne Ereb, ne Ermen, ne jî Laz û Çerkes dikarin mafên xwe bigirin. Aştî mayinde nabe. Armanca me ew e ku aştî mayinde bibe. Lewma jî Tirkiye bi temamî têkeve pêvajoya demokratîkbûnê.”
‘JIN WÊ BIBIN PÊŞENGÊN AŞTÎ Û DEMOKRATÎKBÛNÊ’
Di berdewamê de Tulay Hatîmogûllari bi lêv kir ku yek ji kirdeya herî girîng a Banga Aştî û Civaka Demokratîk jin in û got: “Birêz Ocalan di her hevdîtina xwe de bal kişand ser azadiya jinê. Bedela herî giran a şer û pevçûnan jinan da. Ev yek di şexsê Edeneyê de jî tê dîtin. Mixabin yek ji bajarê herî zêde cînayetên jinan lê çêdibin ev der e. Em dibêjin dê jin bibin pêşengên aştî û demokratîkbûnê. Divê em dengên xwe bikin yek û vî dengê xwe veguherînin rêxistiniya civakî. Ji ber vê yekê em ji vê serdemê re dibêjin ‘serdema rêxistinkirin, veguherandin û avakirina pêvajoyeke nû’.”
BERTEK NÎŞANÎ OPERASYONÊN LI DIJÎ CHP’Ê DA
Tulay Hatîmogûllari, bal kişand ser operasyonên li dijî CHP’ê û hevşaredarên hatine girtin û got: “Em bi aşkerayî dibêjin ku ka em çawa li Amedê xwedî li demokrasiyê derdikevin, em ê li Stenbolê jî xwedî lê derkevin. Ev peywira me ye. Divê ev operasyon tavilê bên sekinandin ku ji bo pêvajo bitendurist bidome jî girîng e. Ji ber ku ev operasyon pêvajoyê sabote dikin. Pêvajoya Aştî û Civaka Demokratîk bi ser partiyan re ye. Divê aştî civakî bibe û her kes qebûl bike. Em bang li îktîdarê dikin ku li Meclisê komîsyonekê ava bikin û kîjan şaredariyê nelirêtî kiribe bila derxîne holê. Lê divê li hemû şaredariyan vê bikin. Hedefgirtina şaredariyên muxalefetê zirarê dide pêvajoyê.”
‘DIVÊ KOMÎSYON LI OCALAN GUHDARÎ BIKE’
Tulay Hatîmogûllari, got ku yek ji sedemên esasî ya pêvajoyê geşedanên li herêmê ne û got ku rewşekî krîtîk bû ku Tirkiyeyê aştiya navxweyî bikira. Tulay Hatîmogûllari, diyar kir ku divê komîsyon di ferqa berpirsyartiya xwe de be, gavên şênber biavêje û divê bendewariyên gel bi cih bîne û ev yek berpirsyartiya mekanîzmayên dewletê ye. Tulay Hatîmogûllari, wiha dirêjî da axaftina xwe: “Bû mehek ku bi birêz Abdullah Ocalan re hevdîtin nayên kirin. Lê gel dixwaze hevdîtin bidomin û derfetên ku birêz Ocalan bi serbestî bixebite û fikrên xwe parve bike bên avakirin. Ev hêj çênebûye. Divê ev merc tavilê bên cîbicîkirin. Divê komîsyon tavile bi birêz Ocalan re hevdîtinê bike.”
‘JI BILÎ AŞTIYÊ TU RÊ NÎNIN’
Tulay Hatîmogûllari, da zanîn ku ji bo pêvajoyên çareseriyê bi ser bikevin, hevdîtinên şefaf ên bi sermuzakerevanan re krîtîk in û ev tişt anî ziman: “Sermuzakerevanê vê pêvajoyê jî birêz Ocalan e. Astengkirina hevdîtinan û vehêlandina wan, xitimandina pêvajoyê ye. Ev ê jî gelên Tirkiyeyê naxwazin. Lewma divê tavilê hevdîtin bên destpêkirin. Birêz Bahçelî di axaftineke xwe de digot ‘Bila Ocalan were li Meclisê biaxive.’ Vaye gel jî li benda vê ye. Hêviyên gel ên ji komîsyonê zêde ne. Entegrasyona demokratîk, yasayên azadiyê, yasaya înfazê hwd. Her wiha li benda yasaya aştiyê ya taybet e. Divê komîsyon van mijaran tavilê bigire rojeva xwe. Ji bilî aştiyê tu rêyên me nînin.”
BERTEKA LI DIJÎ DESTÛRNEDAYÎNA ZIMANÊ KURDÎ
Tulay Hatîmogûllari, axaftina xwe wiha qedand: “Komîsyonek ji bo çareseriya aştiyane ya pirsgirêka Kurd tê avakirin lê nahêle sembolên têkoşîna aştiyê bi zimanê dayikê biaxive û Tirkî lê tê ferzkirin. Ev bi tu awayî nayê qebûlkirin. Divê komîsyon tavilê dev ji vê xeletiyê berde. Aştî bi her kesî dide qezenckirin. Ev serdem serdemeke nû ye. Em di serdema guherîn û veguherînê de ne. Divê em bi fikr, ked û xebatên xwe pêş bikevin.”
Piştî axaftina Tulay Hatîmogûllariyê, hevdîtin ji çapemeniyê re girtî domiya.
