Xelatgirên “Xelatên Rojnamevanên Serkeftî yên Sala 2024an” ku her sal ji aliyê Cemiyeta Rojnamevanên Hemdem (ÇGD) ve tê lidarxistin, bi merasîmekê xelatên xwe girtin. Di merasîma xelatdayînê ya ku li Navenda Hunerên Hemdem a Şaredariya Çankayayê hat lidarxistin de Hevseroka Partiya Wekhevî û Demokrasiyê ya Gelan (DEM Partî) Tulay Hatîmogullari û Serokê Giştî yê CHP’ê Ozgur Ozel û gelek rojnamevan û nivîskar amade bûn.
Tulay Hatîmogullari di merasîmê de axivî û diyar kir ku ew zextên li ser rojnamevanên muxalîf qebûl nakin û got: “Em ne tenê weke siyasetmedar, weke welatiyên ku mafê agahî wergirtinê diparêzin zextên li ser rojnamevanan qebûl nakin. Em spasiyên xwe pêşkêşî kedkarên Çapemeniya Azad dikin. Kedkarên çapemeniyê yên ku bedelên giran dane weke; Birêz Mûsa Anter, Vedat Turkalî, Ugur Mumcu, Metîn Goktepe, Nazim Daştan, Cîhan Bîlgîn û gelek rojnamevanên ku dema peywira xwe bi cih dianîn jiyana xwe ji dest dan, bi bîr tinîm. Em soz didin wan; wê careke din pênûs, berçavk û klavye neyên şikandin. Bi hêviya ku em bi hev re Tirkiyeyeke demokratîk, Çapemeniya Azad bi awayekî azad û demokratîk pîşeya xwe pêk bîne, ava bikin.”
‘EM Ê TÊKOŞÎNÊ BIDOMÎNIN’
Ozgur Ozel jî diyar kir ku Tîmur Soykan ji ber hatiye binçavkirin nikare xelata wergire û got: “Heta roja ku hemû rojnamevanên li vî welatî bi awayekî azad karibin pîşeya xwe bikin, em ê têkoşîna hevpar bidomînin.”
Piştre xelatên rojnamevanan hatin dayin.
