Yekîneyên Parastina Jin (YPJ) û Meclisa Jinan a Partiya Yekitiya Demokratîk (PYD) li Kobanê komxebatek bi dirûşma “Di bin ala Yekîneyên Parastina Jin de yekbûna jinên sûriyeyî ji bo azadî, edalet û wekheviyê” li hola navenda PYD’ê ya bajarê Kobanê bi amadebûna bi dehan jinan lidar xist.
Komxebat bi rêzgirtinê destpê kir, piştre hevseroka PYD’ê ya kantona Firatê Bêrîvan Îsmaîl got: “YPJ hêza xwe di şoreşa Rojava de îsbat kir û her tim têkoşîn kir da ku gelê xwe û jinên li Rojava bi her awayî biparêze. Rêber Apo hêz da jinan û wekî ku Rêber Apo gotibû ku projeya min a ku min ji bo jinan dabû destpêkirin niha temam bûye. Ev yek jî diyar dike divê jin li ser fikir û felsefeya Rêber Apo xwe xurttir bikin û ji bo mafên xwe ji nava Sûriyeyê de ava bikin, têkoşîn û berxwedana xwe xurttir bikin.”
Fermandara YPJ’ê Rewşen Zana destnîşan kir ku ew ê destê Rêber Apo xurt bikin û wiha got: “Rêber Apo bi nav kir ku şoreşa 19’ê Tîrmehê şoreşa jinê ye. Eger em li vir rûniştine, bi vê hêzê û hebûnê, em ê hîna hêza xwe xurtir bikin û destê Rêber Apo xurtir bikin. Piştî hilweşandina Rêjîma Beesê, hukumeta Veguhêz hebûna jin di nava xwe de qebûl nake û Yekîneya Parastina Jin qebûl nake. Di demên dawiyê de Fermandar Rohilat Efrîn daxuyanî da ku em tevlî hukumeta veguhêz nabin, ji ber ku ew jî me di nav xwe de qebûl nake. Ji ber ku vê yekê yekî ku me di nav xwe de qebûl neke, em jî wan naxwazin. Ji bo vê yekê helwesta me û hebûna me, me biryar da ku em ê heta dawiyê têkoşîna xwe xurtir bikin û bibin xwedî hêza herî xurt.”
Rewşen Zana diyar kir ku bi derketina YPJ’ê re jin bûn xwedî hêz û vîna herî xurt û got: “YPJ xwedî bingehe, xwedî çandeke herî berxwedêre û ji bo jinên li Sûriyê em ê têkoşîn û berxwedana xwe xurtir bikin. Divê hemû jin berê xwe bidin nava YPJ’ê.”
Beşdaran jî diyar kir ku ew ê ji bo mafên hemû jinan têkoşîn û berxwedana xwe xurttir bikin û ew ê bi hêza xwe mafên xwe di nava Sûriyeyê de misoger bikin.
Di dawiyê de encamnameya komxebatê ji aliyê endama PYD’ê Leyna Ehmed ve hate xwendin. Encamname wiha ye:
1. Tekezkirina li ser berdewamiya têkoşîna femînîst di bin parastina Yekîneyên Parastina Jin de wekî sembola berxwedan û rizgariyê li dijî her cure zordarî û dagirkeriyê.
2. Parastina pergala hevserokatiyê di saziyên Rêveberiya Xweser de wek modeleke ku wekheviya rastîn di biryardanê de di navbera mêr û jinan de garantî dike.
3. Xebata ji bo misogerkirina beşdariya jinan di nivîsandina destûra nû ya Sûriyeyê de, tevî aliyên wê yên civakî-aborî.
4. Bi xurtkirina xebata dilxwazî ji bo pêşxistina çanda wekhevî û jiyana hevbeş, rûbirûbûna hişmendiya baviksalar û kevneşopên dûrxistinê.
5. Berfirehkirina rola jinan di avakirina aboriya civakî û bidestxistina xweseriya jinan de bi rêya projeyên hevkarî û pêşkeftinê.
6. Xurtkirina hevgirtinê di navbera jinên sûriyeyî de.
7. Tekezkirina rola jinan di avakirina aştiyê û parastina destkeftiyên ku bi xwîna şehîdên jin hatine bidestxistin de, bi berçavgirtina ku aştiya rastîn bi rizgarkirina jinên dagirkirî dest pê dike.
8. Pabendbûna bi prensîbên konfederalîzma demokratîk û biratiya gelan wek bingeha avakirina Sûriyeya nû. Di encamê de, beşdaran rêz li şehîdên jin ên ku di nav refên YPJ’ê de ketine girtin. Yekîneyên Parastina Jin pabendbûna xwe ya bi têkoşîna ji bo azadî, edalet û wekheviyê re nû kiriye. Ev bangek ji bo jinên ciwan e ku tev li refên Yekîneyên Parastina Jin bibin da ku wan xurt bikin.
Komxebat bi dirûşmên “Jin Jiyan Azadî” û “Bê Serok jiyan nabe” bi dawî bû.
