Saziyên mafên mirovan ên Rojhilatê Kurdistanê û Îranê, têkildarî binpêkirinên rejîma Îranê yên li dijî jinên girtî agahiyên berfireh belav kirin.
ÇARENÛSA ŞÎRÎN MESÛDÎ NE DIYARE
Pênc roj di ser binçavkirina çalakvana Kurd û endama koma çiyageriyê ya “Razan” Şîrîn Mesûdî re derbas dibin, lê heta niha tu agahiyeke zelal li ser çarenûs û rewşa wê nehatiye parvekirin.
Şîrîn Mesûdî ku xelkê Mehabadê ye, di 19’ê Gulana 2026’an de ji aliyê hêzên îstîxbarata Îranê (Îtîlaat) ve li cihê karê xwe, bi bikaranîna tundûtûjiyê û bêyî biryara dadgehê hat binçavkirin. Piştre ew birin girtîgeha saziya ewlehiyê ya bajarê Urmiyeyê.
Tevî hewldanên ên malbata wê ji bo agahdarbûna li ser cih û rewşa wê, saziyên ewlehî û dadweriyê heta niha tu daxuyaniyeke fermî nedane wan.
CEZAYÊ SÊ MEH GIRTÎGEHÊ LI ÇALAKVANEKÊ HAT BIRÎN
Her wiha çalakvana Kurd a 58 salî ya bi navê Mehnaz Xoşnûd ku xelkê Bukanê ye, ji aliyê şaxa 101’emîn a Dadgeha Sûcan a Bajarê Bukanê ve, bi tohmeta “propagandaya li dijî dewletê” cezayê sê meh girtîgehê lê hat birîn.
Mehnaz Xoşnûd berê jî ji ber xebatên xwe yên di sala 2024’an de, bi heman tometa “propagandaya li dijî hikûmetê”, ji aliyê şaxa 101’emîn a Dadgeha Sûcan a Bukanê ve cezayê 10 meh girtîgehê yê taloqkirî lê hatibû birîn.
RÊGIRTINA LI BER BERDANA MAESÛME NEMÎNÎ YA JI GIRTÎGEHA GORGANÊ
Girtiya siyasî Maesûme Nemînî ya 63 salî, piştî derbasbûna zêdetirî 140 rojan di ser binçavkirina wê re, hîn jî di Girtîgeha Gorganê de di bin şert û mercên nezelal de tê girtin. Tevî ku Dozgeriya Giştî û Dadgeha Şoreşê ya Gorganê biryara berdana wê ya bi kefaletê daye û malbata wê jî ev kefalet amade kiriye, lê saziyên ewlehiyê yên peywendîdar berdewam in di rêgirtina li ber berdana wê ya demkî de.
Maesûme Nemînî di meha Nîsana 2026’an de ji aliyê hêzên îstîxbarata Îranê (Îtîlaat) ve hatibû binçavkirin û ber bi cihekî nediyar ve hatibû veguhestin. Ew berê jî di sala 2019’an de bi tometa parastina mafên birayê xwe yê binçavkirî, salekê di Girtîgeha Fardîs a bajarê Karacê de mabû. Piştî berdana wê ya ji Girtîgeha Fardîsê jî, bi hertim di bin çavdêrî û zextên saziyên ewlehiyê de bû û gelek caran hatibû gazîkirin û gef lê hatibû xwarin.
REDKIRINA DESTÛRA BÊHNVEDANÊ YA JI BO MAESÛME SERFRAZADE
Maesûme Serfrazade ya nişteciha bajarê Necefabadê û temenê wê nêzîkî 50 salî ye, di Girtîgeha Dewletabad a bajarê Îsfahanê de cezayê pênc sal girtîgehê derbas dike.
Maesûme ku dayika du keçên 14 û 18 salî ye, tevî ku zêdetirî salekê ye di binçavkirin û girtîgehê de ye, heta niha mafê destûra bêhnvedanê û azadiya demkî jê re nehatiye dayîn.
Girtiya siyasî Measûme di Tîrmeha 2025’an de, di dema şerê 12 rojî yê navbera Îsraîl û Îranê de, ji aliyê hêzên îstîxbarata Îranê ve hatibû binçavkirin û piştre bi tometa “têkdana ewlehiya neteweyî ya li dijî dewletê” cezayê pênc sal girtîgehê lê hatibû birîn.
Di bin van şert û mercan de, saziyên mafên mirovan berdewam teqez dikin ku divê rêz li mafên qanûnî yên girtiyan bê girtin û destûr bê dayîn ku bigihîjin parêzer, mafê kefaletê û mafên xwe yên bingehîn.
