Platforma Saziyên Demokratîk, di çarçoveya kampanyaya “Ji Abdullah Ocalan re azadî, ji pirsgirêka Kurd re çareseriya demokratîk” de duh ji Amedê ber bi Enqereyê ve “Meşa Çareseriya Demokratîk û Azadiyê” da destpêkirin. Meşvanên ku Hevserokên Giştî yên Partiya Herêmên Demokratîk (DBP) Çîgdem Kiliçgun Uçar û Keskîn Bayindir jî di nav de ne, îro li Rihayê bûn. Meşvan, ji ewil derbasî navçeya Sêweregê bûn. Li vir ji hêla girseyeke qelebalix ve hatin pêşwazîkirin û piştre derbasî navçeya Curnê Reş bûn. Piştre jî derbasî navenda Rihayê bûn û li Parka Alî Şellî hatin gel hev.
Gelek kes tevlî meşê bûn. Di meşê de lolîpopên “Ji çareseriyê re erê, ji tesfiyeyê re na”, “Berxwedan jiyan e”, “Em di çareseriyê de biisrar in, dê bi ser kevin”, “Em ji hêza teorîk û pratîk bibawer in”, “Jin, jiyan, azadî”, “Berxwedan dê bidome, silav ji azadiyê re”, “Em rê nadin talanê” û “Tecrîd didome” hatin hilgirtin. Girseya li pêş pankarta “Meşa çareseriya demokratîk” hate gel hev, dirûşmên “Bijî berxwedana Rojava”, “Her der Rojava, her der berxwedan”, “Bijî bexwedana gelê me” û “Jin, jiyan, azadî” berz kir. Polîsan destûra meşê nedan lewma daxuyanî di hundirê parqê de hate dayin.
Di daxuyaniyê de ji ewil Hevserokê Giştî yê Partiya Herêmên Demokratîk (DBP) Keskîn Bayindir axivî û got ku ji bo çareseriya demokratîk dimeşin lê her tim astengî tên derxistin. Bayindir, wiha domand: “Hûn nikarin îrade û meşa me asteng bikin. We heta niha nekarî bi astengkirinan encamekê bi dest bixin. Li Sûriye, Rojava piştî reva Esad li Rojhilata Navîn şerê cîhanê destpê kir. Ev şer roj bi roj nêzî vir dibe. Navenda vî şerî xaka me ye. Dixwazin îradeya gelê Kurd bi destê çeteyan bişikînin. Dê gelê me siyaseta we qebûl neke. Rojava, nifteya aştî û yekitiyê ya Sûriyeyê ye. Statûyeke gelên Rojava heye. Hûn dixwazin vê statûyê têk bibin û ev dijminatî ye. Ev 13 sal in Rêveberiya Xweser peyamên pêkvejiyanê dide, daxwaza aştiyê dikin. Lê Tirkiye bi destê DAÎŞ’ê şer dide destpêkirin. Amadekariyên şerê li dijî Rojava dike. Ne ji bo şer û dagirkeriyê, ji bo naskirina statûya Kurdan amadekariyan bikin.”
BANGA JI BO CIVÎNA AWARTE
Bayindir, diyar kir kul îktîdar peyamên şer dide û ev tişt anî ziman: “Tevahiya cîhanê statûya Rojava nas dike lê îktîdar şer derdixe pêş û vê statûyê nas nake. Kurd yek in û dê ji bo statûya xwe têbikoşin. Em ê li dijî van polîtîkayên we yên dagirkeriyê li ber xwe bidin. Dê gelê Kurd statûya xwe bi dest bixe û ev mafê me ye. Dê zîhniyeta we bi ser nekeve, hûn ê têk biçin. Em, rêya çareseriyê pêşkeşî we dikin. Rêyeke çareseriyê heye, ew rê jî birêz Ocalan e. Bi siyaset, zîhniyet û pêşdîtinên xwe tekane kesê dikare rê li ber şer bigire, birêz Ocalan e. Ev meş, meşa çareserî û aştiyê ye. Pêşiya vê negirin. Banga me ji bo hemû partî û parlamenterên li Meclîsê ev e; bila Meclîs bi tevahiya hêza xwe ji bo çareseriya pirsgirêka Kurd bi awayeke awarte bicive. Ji bo amadekirina çarçoveya qanûnî û destûra bingehîn a meseleya Kurd, divê her kes berpirsyartiyê li xwe bigire.”
Bayindir, bang li gelê Kurd û gelên Tirkiyeyê jî kir û wiha got: “Gelên mazlum êdî çareseriyê dixwazin. Daxwaza wan eştiyeke birûmet û mayinde ye. Dixwazin li ser vê xakê azad bijîn. Dê dîrok van rojan binivîse. Divê her ferdek ji bo aştiyê îradeya xwe nîşan bide. Divê înkara sedsal in didome bi dawî bibe û her kes ji bo vê têbikoşe. Divê Meclîs êdî ne ji bo tezkereyên şer lê ji bo naskirina îradeya gelê Kurd biryaran bide. Li ku derê dijî bila bijî, banga me ya ji bo her Kurdekî ev e; em di rojên dîrokî de ne û divê em destkeftiyên gelê xwe biparêzin. Roj, roja yekitiyê ye.”
‘EM Ê DESTÛRÊ NEDIN ÊRÎŞA LI DIJÎ ŞOREŞA JINÊ’
Aktîvîsta TJA’yê Çagler Demîrel jî di daxuyaniyê de wiha got: “Ro ya Rihayê îro Rojava û her derê germ dike. Em şer û geşedanên li Sûriyeyê dibînin. Em jin, navnîşana çareseriyê pêşkeş dikin. Em ê destûrê nedin êrîşên ser şoreşa jinê. Li ku derê dibe bila bibe ev têkoşîn dê bidome. Statûya Rojava û şoreşa jinê ya li Rojava ji bo hemû cîhanê mînak e. Hûn çima êrîş dibin ser cihê ku gel, jin û hemû bawerî xwe lê azad dibînin? Em ê têkoşîna jinan bi felsefeya ‘Jin, jiyan, azadî’ mezin bikin. Çavê hemû gelên cîhanê li Rojava ye û gelên li wir jiyaneke mînak ava kirin. Meşa me ji bo çareseriya pirsgirêka Kurd rêyê pêşkeş dike. Hûn nikarin bi polîtîkayên şer tiştekî bi dest bixin. Muxatabê çareseriya pirsgirêka Kurd birêz Ocalan e. Her kes jî dizane bê muxatab kî ye. Navnîşana çareseriyê, birêz Ocalan e û divê gava ji bo azadiya wî ya fîzîkî were avêtin. Deriyên Îmraliyê vekin û bila birêz Ocalan ji hêla fîzîkî ve azad bibe. Em li Rojava aştiyê pêk bînin û li seranserî Rojhilata Navîn belav bikin. Weke jin em vê pêk bînin.”
Piştî daxuyaniyê, meşvan ji bo hevdîtina bi gel re derbasî Baroya Rihayê bûn.
