Doh ji bajarê Kobanê bi sedan kes berê xwe da Bendava Tişrînê û beşdarî çalakiya parastina bendavê ji êrişên dewleta Tirk a dagirker û çeteyên wê bûn.
Îro serê sibehê şêniyan dest bi paqijkirina bendavê kirin. Şêniyan diyar kir ku wê çalakiya parastina bendavê ji êrişên artêşa Tirk a dagirker û çeteyên wê bidomînin. Her wiha îşaret pê kir ku ew moralê xwe ji serketina berxwedana Kobanê ya li hemberî çeteyên DAIŞˈê digirin.
Şêniyan dane zanîn ku çi qasî êriş dijwar bin jî ew bendavê terk nakin. Şêniyan destnîşan kir ku bendav ji bo gelemperiya gelê Sûriyeyê destkeftiyek e û parastina wê erkekî nîştimanî ye.
Şêniyan gotin: “Em li vir in da ku ji dewleta Tirk a dagirker re îsbat bikin ku em xwediyê vê axê ne û êriş çiqasî dijwar bin jî em terka axa xwe nakin. Em ê bendavê biparêzin û têkoşînê berdewam bikin heya herêmên dagirkirî rizgar bikin.”
Êrişên dagirkerî û qirkirinê yên dewleta Tirk a dagirker ên li ser Bendava Tişrînê dewam dikin. Gelê Bakur û Rojhilatê Sûriyeyê ev 19 roj in nobeta parastina bendavê digirin.
