Di 16’ê Tîrmeha 2025’an de, bajarê Siweyda û gelê wê rastî êrîşeke giran hatin. Ev êrîş ji aliyê komên girêdayî hikûmeta Şamê ya veguhêz ve hate pêk anîn. Komên girêdayî hikûmetê bi awayekî hovane li dijî gelê Siweydayê komkujî pêk anîn. Li kolan, malan, bazar û ser kar sivîlên Durzî hatin qetilkirin. Li gel vê, Nexweşxaneya El-Wetanî hat hedef girtin; hêzên rejîmê bi tank û topan êrîşî wê kirin. Nexweş, bijîşk, hemşîre û sivîlên birîndar ên di hundir de rastî gulebaranê hatin, gelek ji wan jiyana xwe ji dest dan. Ev êrîş bû sedema komkujiyek din pêk were.
Bijîjkek ku ji êrîşa li ser nexweşxaneyê rizgar bûyî, diyar kir ku pêşî êrîş ji aliyê ambulansê dest pê kirine û got ku li wir talan, dizî û kuştin pêk hatine. Her wiha diyar kir ku hemû alavên bijîşkan ên li nexweşxanê hatine wêrankirin, telefon hatine desteserkirin û pergalên nexweşxaneyê hatine rûxandin.
Hemşîreyeke, din van êrîşên li dijî nexweşxaneyê wekî nemirovane bi nav kir û diyar kir ku nexweşxane êdî ne tesîseke tenduristiyê ye, veguheriye cihê xwînrijandin û mirinê. Her wiha ragihand ku piştî êrîşê jiyana rojane ya li bajêr bi tevahî rawestiyaye, înternet qut bûye û got, “Berî çend li gorî ku me agahî girt, agirberst hatiye ragihandin. Lê gelo ev çiqas raste? Ji ber heta van kêliyan jî birîndar tên nexweşxanê. Ev hêz bi hinceta parastina gel û bajarê Siweyda ketin bajêr, lê komkujî, talan û wêranî kirin.”
Heman hemşîre, anî ziman ku komên alîgirê rejîmê ne dişibihîn welatiyên Sûriyeyê û got ku li dijî van koman gelê herêmê di pozîsyona xwe parastinê de ne.
