Cenazeyê Hevserokê Rêxistina Partiya Wekhevî û Demokrasiyê ya Gelan (DEM Partî) yê Êlihê Mûstafa Mesût Tekîk ku di encama krîza dil de jiyan xwe ji dest da, li Êlihê hat veşartin. Cenazeyê Tekîk ku li Stenbolê piştî wecîbeyên olî ber bi warê wî bi rê kirin, li Balafirgeha Êlihê ji aliyê Hevserokên Partiya Herêmên Demokratîk (DBP) Çîgdem Kiliçgun Ûçar, Keskîn Bayindir, Hevseroka Partiya Wekhevî û Demokrasiyê ya Gelan (DEM Partî) Tulay Hatîmogûllari, parlementerên DEM Partiyê, Meclîsa Dayikên Aştiyê, Tevgera Jinên Azad (TJA), Platforma Ked û Demokrasiyê ya Êlihê û ji aliyê bi hezaran kesî ve hate pêşwazîkirin.
Girseya ku bi karwanê ji sedan wesayîtan pêk dihat derbasî Taxa Tilmercê bû, li pişt cenazeyê Tekîk dest bi meşê kir.
Girseya ku bi dirûşmeya “Şehîd namirin” ber bi Taxa Tilmercê ve meşiyan, cenazeyê Tekîk li kêleka goristana xwişka wî rojnamevan Gulîstan Tara ku di 23’ê Tebaxa 2024’an de li Silêmaniyeyê ji aliyê SÎHA’ya dewleta Tirk ve hate qetilkirin, hate veşartin. Hevseroka DEM Partî ya Êlihê Songul Kormaz piştî veşartina cenazeyê axivî û diyar kir ku ev şahidî ji ezma têkoşînê yê Tekîk re kiriye û sersaxî da gelê bajêr.
TÊKOŞÎNA 35 SALÎ
Hevserokê DBP’ê Keskîn Bayindir jî îşaret bi têkoşîna 35 salî ya Tekîk kir û wiha got: “Emê aştiyekî bi rûmet diyarî Tekîk û malbata wî bikin. Windahiya bêdem bi êş e. Di têkoşîna xwe ya 35 salî de digot, “Wê azadî were, aştiya bi rûmet were”. Em soz didin wan ku em ê aştiya bi rûmet ava bikin. Bila serê gelê Kurd sax be. Bîranîna wî di têkoşîna me de jiyan bike.”
‘EM Ê AŞTIYA BI RÛMET AVA BIKIN’
Hevseroka DEM Partîyê Tulay Hatîmogullari jî wiha got: “Me di kampanyaya ked û edaletê de bi hev re kar kir. Qetilkirina hevrê Gulîstan dilê wî şewitand. Me di rûyê wî de wê êşê dîdît. Bûyîna hevrêya mirovekî wiha ji bo me rûmet e. Oxir be heval Mustafa. Em ê aştiya bi rûmet ava bikin.”
‘MÎRATEYA TÊKOŞÎNÊ HIŞT’
Birayê wî Ahmet Bulent Tekîk jî wiha got: “Wekî bav, xwişka min Gulîstan, birayê min Mustafa jî ji vê cîhanê çû. Me welatparêziyê ji bavê xwe girt. Gulîstan û Mustafa jî bi hişmendiya vê tevlî têkoşînê bûn. Mustafa 35 sal hem di têkoşîna sendîkal û hem jî têkoşîna partiyê de cih girt. Berxwedanê wekî mîrate ji me re hişt.”
Piştre peyama sersaxiyê ya ku ji aliyê hevalên têkoşînê ya Gulîstan Tara ve hatibû şandin, ji aliyê Hevserokê DBP’ê yê Êlihê Resûl Çetîn ve hate xwendin. Piştî axaftinan qurnefîl danîn ser gora Mustafa Mesut Tekîk û Gulîstan Tara.
