Donald Trump piştî bombardûmana li ser navendên nukleerî yên Îranê li ser medya dîjîtal daxuyaniyek da û got, “Bi qasî ku ji dîmenên peykê têne dîtin, xisareke gelekî mezin li hemû navendên nukleerê yên Îranê bûye. Gotina herî rast ew e ku mirov bibêje bi temamî tine bûye.”
Trump got, “Xisara herî mezin di binê erdê de pêk hat. Tam lê ket.”
‘GUHERTINA REJÎMÊ ÇIMA NEBE?’
Beriya niha gelek payebilindên rêveberiya Washingtonê îdîa kirin ku armanca destwerdana Emerîkayê guhertina rejîmê nîne, lê belê Donald Trump bal kişand ser vê nêta xwe. Donald Trump li ser hesabê xwe yê medya dîjîtal Truht Socialê got, “Eger rejîma heyî ya Îranê MEZINAHIYA ÎRANÊ RADESTÎ WÊ NAKE wê demê çima guhertineke rejîmê nebe?”
RUBIO DI MIJARA TENGAVA HURMUZÊ DE HIŞYARÎ DA
Wezîrê Karên Derve yê DYE’yê Marco Rubio jî hişyarî da Îranê ku dest ji meyla xwe ya girtina Tengava Hurmuzê berde ku yek ji pênc parên petrola hilberandî ya cîhanê jê derbas dibe.
Rubio ji Fox Newsê re axivî û got, “Eger vê bikin, hingî wê xeteyeke din a metirsîdar kiribin. Eger vê bikin ev yek wê ji bo wan bibe întihara aboriyê, em jî dikarin li hemberî vê yekê tedbîran werbigirin.”
Rubio got, “Ez hikumeta Çînê teşwîq dikim ku di vê mijarê de bang li wan bike, ji ber ku ji bo Çîn ji bo petrolê bi giranî bi Tengava Hurmuzê ve girêdayî ye.” Çînê jî bombardûmana Dewletên Yekbûyî yên Emerîkayê (DYE) ya li ser Îranê şermezar kir.
DYE’YÊ BANG LI WELATIYÊN XWE KIR KU HÎN BÊHTIR BALDAR BIN
Washingtonê piştî êrîşa roja Yekşemê ya li ser navendên nukleerê yên Îranê û gefa Tehranê ya bersivdayinê, bang li welatiyên xwe yên li cîhanê kir ku hîn bêhtir baldar bin.
Di daxuyaniya nivîskî de hate gotin, “Wezareta Karên Derve pêşniyarê li welatiyên Emerîkî yên li çar aliyên cîhanê dike ku hîn bêhtir baldar bin.”
LI NAVENDA LEŞKERÎ YA LI KIRMAŞANÊ HATE XISTIN
Artêşa Îsraîlê sibeha Duşemê di roja 11’emîn a şerê navbera herdu welatan de ragihand ku li navendên binesaziya leşkerî yên Îranê yên li bajarê Kirmaşan ê Rojhilatê Kurdistanê xistiye. Di daxuyaniya artêşê de hate gotin, “Hêzên hewayî li binesaziya leşkerî ya li bajarê Kirmaşan ê Îranê dixin.”
Artêşa Îsraîlê her wiha roja Yekşemê ragihand ku li navenda fuzeyan û binesaziya leşkerî ya li rojavayê Îranê xistiye û got, “Di çarçoveya êrîşan de hêzên hewayî yên Îsraîlê li binesaziya avêtin û depokirina fuzeyan xistin ku bi armanca zerardayina li Dewleta Îsraîlê dihatin bikaranîn.” Her wiha hate ragihandin ku li binesaziya peyka leşkerî û radarê ya li rojavayê Îranê hatiye xistin.
VÊ ŞEVÊ LI 6 BALAFIRGEHAN HATE XISTIN: 15 BALAFIR HATIN ÎMHAKIRIN
Artêşa Îsraîlê vê sibehê daxuyaniyeke nû da û got, “Artêşa Îsraîlê li Îranê êrîş bir ser 6 balafirgehan. Balafirên bêmirov 15 balafirên şer û helîkopterên şer ên rejîma Îranê îmha kirin.”
Di daxuyaniyê de hate gotin, “Îran hewl dide qada xwe ya hewayî xurt bike. IDF (Artêşa Îsraîlê) li rojava, rojhilat û herêma navendî ên Îranê êrîşî 6 balafirgehan kir. Di dema bombardûmanê de êrîş li balafirên rejîma Îranê yên F-14, F-F û AH-1’ê ahte xistin.”
LI LORISTANÊ DRONEYA ÎSRAÎLÊ HATE XISTIN
Artêşa Îsraîlê piştrast kir ku balafireke bêmirov a wan ku li eyaleta Loristanê operasyonên leşkerî dimeşand hatiye xistin.
NETANYAHU: EM Ê LI ÎRAN Û XEZEYÊ BI XURTÎ KARÊ XWE DEWAM BIKIN
Serokwezîr Binyamin Netanyahu êvara Yekşemê di civîneke çapemeniyê de ku berê hatibû qeydkirin anî ziman ku Îsraîl wê li Îran û Xezeyê ‘bi tam kapasîteya xwe’ karê xwe dewam bike.
ÎRAN: EM Ê BERSIVA BI BIRYAR BIDIN
Ajansa nûçeyan a li Îranê bi Erebî weşanê dike, ragihand ku fermandarê artêşa Îranê gotiye, “Emerîkiyan dema ku sûc kirin her carê bersiveke bi biryar wergirtin, vê carê jî wê heman tişt bibe.”
GELO MILÎSÊN LI IRAQÊ XWE JI BERSIVDAYINÊ RE AMADE DIKIN?
Rojnameya Al Akhbar a Lubnanê ku ser bi Hîzbûllahê ve ye, ragihand ku milîsên alîgirê Îranê yên li Iraqê xwe amade dikin ku bersiva êrîşa Emerîkayê ya li ser navendên nukleerê bidin.
HÎZBÛLLAH WÊ TEVLÎ ŞER NEBE
Çavkaniyên Lubnanî daxuyanî dan rojnameya Siûdî Eşarq El Ewsat û diyar kirin ku Hîzbûllah di helwesta xwe de bi biryar in ku tevlî şerê bi Îsraîlê re nebe.
ÎRAN Û RÛSYA HELWESTA XWE KOORDÎNE DIKIN
Wezîrê Karên Derve yê Îranê Abbas Arakçî roja Duşemê serdana Moskowê kir.
Li gorî ajansa nûçeyan a Rûs TASS’ê, Rûsya û Îranê têkildarî rageşiya heyî ya li Rojhilata Navîn “Helwesta xwe koordîne dikin.”
