Hamasê, di daxuyaniya xwe ya nivîskî ya roja Şemiyê de got, “heta ku dagirkeriya Îsraîlê berdewam bike, berxwedana çekdarî mafê me yê rewa ye.” Hamasê diyar kir ku ew di serî de “damezrandina dewleteke Filistînî ya serbixwe û serwer ku paytexta wê Qudus be” daxwaz dikin.
Ev daxuyanî piştî hevdîtina nûnerê taybet ê Amerîkayê Steve Witkoff li Tel Avîvê, bi malbatê girtiyên Îsraîlî yên ku 22 meh in li Xezeyê têne girtin, hat.
Hat ragihandin ku Witkoff ji malbatê girtiyan re gotiye, “em pir nêzîkî bidawîkirina şer in” û bi vê yekê îşaret kiriye ku dibe Hamas amade be çekan berde.
Di 7ê Cotmeha 2023’an de, di êrişa Hamasê ya li ser Îsraîlê de 1,219 kesan jiyana xwe ji dest dabû û 251 kes jî hatibû girtin. Li gorî artêşa Îsraîlê, 49 ji van girtiyan hê jî li Xezeyê têne girtin, lê 27 ji wan mirine.
Di êrişên Îsraîlê de jî li Xezeyê herî kêm 60,332 kes mirin, ku piraniya wan sivîl bûn. Ev dane ji aliyê wezareta tenduristiyê ya girêdayî Hamasê ve hatin parvekirin û ji aliyê Neteweyên Yekbûyî ve wekî pêbawer têne qebûlkirin.
JI EWRÛPAYÊ SÎNYALA NASKIRINA FÎLÎSTÎNÊ
Ji ber dirêjbûna şer û xetereya birçîbûnê li Xezeyê, welatên wekî Fransa, Kraliyeta Yekbûyî û Kanada ragihandin ku ew amade ne dewleta Filistînê nas bikin. Lê belê London û Ottawa ji bo vê naskirinê hin şert danîne: bêçekirina Hamasê, azadkirina girtiyan û di hikûmeta Filistînê ya nû de cih negirtina Hamasê.
