Cenazeyê karmenda meclîsê Salîha Akkaş a ku di 6’ê Tebaxê de ji aliyê mêrê ku di pêvajoya hevberdanê de bû bi kêrê hatibû qetilkirin, duh li Çewlîgê hat veşartin. Ji bo Salîha Akkaş li Mizgefta Selahattîn Eyyubî ya li navçeya Uydukentê şîn hat danîn. Rêveberên DEM Partî, DBP’ê yên bajar û navçeyên Çewlîgê, Tevgera Jinên Azad (TJA), Parlamenterê DEM Partiyê yê Çewlîgê Omer Faruk Hulaku û nûnerên rêxistinên sivîl beşdarî serdana sersaxiyê bûn.
Piştî serdanê, bi pêşengiya Platforma Jinan a Çewlîgê li xaçerêya PTT’ê daxuyaniya çapemeniyê hat dayin. Di daxuyaniyê de timî dirûşmeyên “Qirkirina jinan polîtîk e” û “Jin, Jiyan, Azadî” hatin berzkirin.
Sekretera Şaxa Egîtîm-Senê ya Çewlîgê Ceyhan Ogûr li ser navê Platforma Jinan a Çewlîgê daxuyaniya hevpar xwend. Ogûr diyar kir ku Salîha Akkaş gefên lê dihatin xwarin ji rayedarên darazê re ragihandibû û ji ber vê yekê jî biryara parastinê hatibû dayîn. Ceyhan Ogûr anî ziman ku tevî van tedbîran jî, kujer bêyî ku rastî ti astengiyan were Salîha Akkaş qetil kir.
Ceyhan Ogûr sersaxî ji malbat, xizm û hevalên xebatê yên Salîha Akkaş xwest û wiha axivî: “Heta ku berpirsiyarên vê bûyerê bên darizandin û cezakirin em ê têkoşîna xwe bidomînin. Bila baş were zanîn ku em êdî tehemulî qetilkirin û tundiya li ser jinan nakin.”
Daxuyanî bi berzkirina dirûşmeyan bi dawî bû.
