Fermandariya YBŞ’ê bi daxuyaniyekê Fermandar Nûreddîn Sofî bibîranî û got: “Civaka Êzidî wê bi spasdariyê wî bi bîr bîne û çîroka wî wekî sembolek fedakarî û dilsoziyê ji nifşên pêşerojê re veguhezîne.”
Fermandariya Yekîneyên Berxwedana Şengalê (YBŞ) bi daxuyaniyekê nivîskî şehîd Fermandar Nûreddîn Sofî bibîranî. YBŞ’ê ragihand ku Şehîd Nûreddîn Sofî pirek di navbera dilê gelan de bû û îspat kir ku têkoşîna azadiyê ne tenê bi parastina axê ve sînordare, lê di heman demê de parastina rûmet û hebûna mirovan jî dihewîne. YBŞ’ê got: “Civaka Êzidî wê bi spasdariyê wî bi bîr bîne û çîroka wî wekî sembolek fedakarî û dilsoziyê ji nifşên pêşerojê re veguhezîne.”
Daxuyanî wihaye:
“Bi dilên xemgîn û îradeyek tijî dilsoziya bi xwîna şehîdan re, me agahiya şehadeta Heval Nûreddîn Sofî, ku yek ji pêşengên Şoreşa Rojava û zarokekî dilsoz ê Kurdistanê bû, wergirt. Ew di her çalakiyek û xizmetek şoreşgerî de pêşeng bû, di qadên têkoşînê de fermandar û hevalekî dilwêrek bû û heta kêliya dawî ya jiyana xwe ji bo doza azadiya gelên bindest, dilsoz bû.
Bi oxirkirina wî re, Şoreşa Rojava yek ji stûnên xwe yên bingehîn winda kir û di heman demê de Kurdistanê yek ji zarokên xwe yên qehreman çavnetirs winda kir, ku di bicihanîna erkê xwe yê li hember gelê xwe û doza wan de qet dudilî jiyan nekir. Lê belê, windakirina şehîd Nûreddîn Sofî di bîr û hişê civaka Êzidî de xwedî wateyek taybete, ji ber ku ew di dema fermana Êzidiyan li Şengalê de, di rojek ku mirin, dorpêçkirin û birçîbûn di heman demê de li hev civiyan, di nav yên pêşîn de bû ku ji bo hawar û alîkariya Êzidiyan beziya.
Dema ku rê hatin girtin û malbatên Êzidî di navbera çiya û dijmin de asê man, şehîd Nûreddîn Sofî di pêşengiya hewildanên vekirina korîdora mirovî ya di navbera Rojava û Şengalê de bû. Ev korîdor ji bo deh hezaran jin, zarok û kal û pîran xeta jiyanê peyda kir. Ew ne tenê derbasbûna rêyekê bû; ew rêyek ji mirinê ber bi jiyanê, ji bêhêvîtiyê ber bi hêviyê ve bû, bi saya wêrekî, biryardarî û baweriya wî ya kûr ku erkê mirovahî û netewî ji erkê şoreşgerî nayê veqetandin.
Şehîd Nûreddîn Sofî pirek di navbera dilê gelan de bû û îspat kir ku têkoşîna azadiyê ne tenê bi parastina axê ve sînordare, lê di heman demê de parastina rûmet û hebûna mirovan jî dihewîne. Civaka Êzidî wê bi spasdariyê wî bi bîr bîne û çîroka wî wekî sembolek fedakarî û dilsoziyê ji nifşên pêşerojê re veguhezîne.
Em, wek hêz û civaka Êzidî sersaxî û hevxemiya xwe ya dilsoz ji malbata wî ya birêz, ji hevalên wî yên di Yekîneyên Parastina Gel (YPG) de û ji hemû gelên Rojava û Kurdistanê re pêşkêş dikin. Em soza xwe nû dikin ku emê şopa şehîdan bişopînin heya ku armancên ku wan xwe ji bo wê feda kirine bi dest bixin.
Rûmet û nemirî ji şehîdan re.
Serkeftin û azadî ji gelên bindest re.”
