Rêxistina DEM Partiyê ya Esenyurt a Stenbolê li eywaneke dawetan a li navçeyê çalakiya “Dengbêj li ser aştiyê diaxivin” li dar xist. Hevserokê Giştî yê DEM Partiyê Tuncer Bakirhan û dengbêj Evîn Sindî, Kazo, Mihemedê Serhedî, Mihemedê Beyro, Sebrî Agirî û Xenî û gelek kes tevlî bûn.
‘DIVÊ HER KES XWEDÎ LI AŞTIYÊ DERKEVE’
Di çalakiyê de gelek caran dirûşma “Bijî Serok Apo” hate berzkirin. Çalakî, bi rêzgirtinê dest pê kir. Piştre jî sînevîzyoneke ku dengbêjan vedibêje hate pêşandan. Piştre jî Hevseroka ANYA-KAYDER’ê Medîha Înce axivî û got: “Îro li ser aştiyê tê axaftin. Divê her kes xwedî li aştiyê derkeve.”
‘EM Ê BI HEV RE BI SER BIKEVIN’
Wekîla DEM Partiyê ya Stenbolê Kezban Konukçu jî got: “Divê em ji gel re bibêjin ku pêdiviya vê xakê bi aştiyê heye. Em ê bi hev re bi ser kevin.”
BÎRA GELÊ KURD
Hevserokê Giştî yê DEM Partiyê Tuncer Bakirhan jî anî ziman ku gelê Kurd bi rêya dengbêjan dîroka xwe zaniye û wiha domand: “Dengbêj, ji bo gelê Kurd hunermend, civaknas û dîroknas in. Dema komar hatibû avakirin, ziman, çand û dîroka me hate qedexekirin. Lê dengbêjan bi veşarî di malan de stran digotin. Xwestin bîra gelê Kurd tune bikin lê dengbêjan destûra vê nedan. Em ê mîrateya dengbêj Şakiro, Reso, Zahiro, Hiseyno, Karapetê Xaço, Fatma Îsa, Meryem Xan, Sûsika Simo û Eyşeşanê her zindî bihêlin. Di mijara xwedîderketina li dengbêjan de li ser milê me bar heye. Divê em xwedî lê derkevin. Divê em stranên dengbêjan bi hemû zarokên xwe bidin guhdarîkirin.”
STRANÊN JI BO AŞTÎ Û DEMOKRASIYÊ
Piştre jî metna li ser navê dengbêjan hatiye amadekirin ji hêla dengbêj Mihemedê Serhedî ve hate xwendin. Serhedî, got ku dengbêjî bîra gel e û got: “Êş, xem û birînên gelê xwe heta roja me anîn. Carnan di bin kevirekî de çîroka xezalekê, carnan ji bo Derwêşê Evdî û Edûleyê berê xwe dide Şengalê. Carnan li Cizîra Botan behsa tiştên Bekoyê Ewan kiriye vedibêje, carnan jî ji bo vegotina çîroka Siyabend û Xecê berê xwe dide Serhedê. Îro jî stran ji bo demokrasî, aştî, wekhevî û xwişk-biratiyê bibêjin.”
Piştî axaftinan, li stranên dengbêjan hate guhdarîkirin û govend hate gerandin.
