Komîsyona Polîtîkayên Perwerdeyê ya DEM Partiyê daxuyanî da û got, “Li çar aliyên cîhanê mamoste weke nûnerê zanistî, ked û ronakbîriyê têne silavkirin; lê li welatê me di bin zexteke siyasî, xizanî û bêewlekariyê paşerojê de ne.”
Komîsyonê ragihand ku mûçeyên mamosteyan di binê sînorê xizaniyê de ye û nerazîbûn nîşan da ku paşeroja mamoste, xwendekar û civakê tê desteserkirin.
Komîsyonê got, “Sîstema perwerdeyê demeke dirêj e di bin zexta polîtîkayên yekperest û otorîter de ye” û diyar kir ku li şûna perwerdeyeke demokratîk û zanistî pêlên îslamî ya siyasî, nijadperestî û asîmîlasyon tê ferzkirin.
Di daxuyaniyê de hate gotin, “Em girîng dibînin ku li ser bingeha welatîbûna wekhev jiyaneke civakî ya sekuler bê avakirin, polîtîkayên ji bo vê yekê bêne nîqaşkirin û rêyên çareseriyê bêne peydakirin. Birêxistinkirina perwerdeyê li ser bingeha maf û mafê perwerdeya bi zimanê dayikê em weke mijarên herî girîng dibînin.”
DEM Partiyê xwest, mewzûata yekperestî ya sed salî ku nsaname û çandên cuda tine dihesibîne bê guhertin û hemû qanûnên ku cihêkariyê xwedî dikin bêne guhertin.
DEM Partiyê got, “Xwegihandina li aştiyê, bi avakirina civakeke aştiyane dibe” û ji bo vê jî bang kir ku dest ji pêkanîn û kiryarên antî demokratîk ên berê bêne anîn.
Di daxuyaniyê de hate gotin, “Ji bo aştiyê divê hemû astengiyên li pêşiya jiyana bi hev re ya welatiyên azad a ji çand û nasnameyên cuda ji holê bêne rakirin. Rêyeke din a avakirina civaka demokratîk nîne.” Di daxuyaniyê de ev daxwaz hatin kirin:
“- Mufrefat li gorî esasên zanistî, laîk, demokratîk û pir zimanî jinûve bê sererastkirin.
– Mafê perwerdeya bi zimanê dayikê bi destûra bingehîn bê misogerkirin.
– Divê dawî li polîtîkayên nijadperest, asîmîlasyon û paşverû bê anîn.”
