Konferansa damezirîner a Yekitiya Esnafan bi dirûşma “Bi rêxistinkirina bazara civakî em civakeke demokratîk û azad ava bikin” li bajarê Hesekê yê kantona Cizîrê hat lidarxistin.
Di konferansê de nûnerên saziyên sivîl û leşkerî, partiyên siyasî û rêxistinên jinan, kesayetên olî, akademîsyen, nivîskar, hevseroka Daîreya Têkiliyên Derve ya Rêveberiya Xweseriya Demokratîk a Herêma Bakur û Rojhilatê Sûriyeyê Îlham Ehmed û metranê Cizîr û Firatê ê Suryanên Ortodoks Mar Morîs Emsîh beşdar bûn.
Di serî de hevseroka Yekitiya Esnafan a Bakur û Rojhilatê Sûriyeyê Henîfe Mihemed bixêrhatina mêvanan kir û got ev konferans di encama xebata 6 salan a karê rêxistinî ya bin êriş û bombebaranê de hat lidarxistin.
Piştre Îlham Ehmed lidarxistina konfernasê pîroz kir û got: “Qonaxa ku Sûriye û herêm bi giştî tê re derbas dibe hestiyar e. Di pêvajoya guhartina li Rojhilatê Navîn de Sûriye xwedî roleke sereke ye. Em hîn di destpêka qonaxa ji nû ve sazkirinê de ne. Her çi qas hewldanên guhartina hişmendiya sîsteman hebin, ew qasî sîstemên desthilatdarê ji bo parastina pergala navendî li ber xwe didin.”
Îlham Ehmed got di navbera pergalên desthilatdar ên Rojhilata Navîn û pergalên ku destwerdana kar û barên welatan dikin û hêzên civakî yên demokratîk de, nakokî hene.”
Îlham Ehmed diyar kir ku hîn jî gel bi hêvî ye cudahiya di navbera hikumeta veguhêz û sîstema berê de bibîne û guhartinên cidî di siyasetên wê de hebin û got: “Tevahî gelê Sûriyeyê bendewar e. Ji bo vê qonaxa veguhêz 4 sal li pêşiya me ne. Em bipirsin ka hêviya me wekî gelê Sûriyeyê bi hemû pêkhateyan çi ye? Hêviya me Sûriyeya nenavendî, demokratîk û pirreng e. Lê hewldanên cidî ji bo hiştina vê sîstemê wekî xwe, tên kirin. Di desthilatê de tenê kesayet hatin guhartin, lê siyaset heman in.”
Îlham Ehmed destnîşan kir ku îsrareke mezin ji bo pirrengîbûn û nenavendîbûna Sûriyeyê tê pêşkêşkirin û got: “Di navbera Rêveberiya Xweser û berpirsên hikumeta veguhêz a Sûriyeyê de diyalog hene. Hin caran didomin hin caran qut dibin. Ji bo vê jî welatên navbeynkar hene wekî Amerîka û Fransayê. Ew civînan amade dikin û bi rêve dibin, em jî wekî sûriyeyî dicivin.”
Îlham Ehmed da zanîn ku aliyên navneteweyî li ser maseyê tune ne û ew tenê wekî Sûriyeyî bi hev re dicivin û got: “Berê we bihîstibû ku di mijara tevlêkirina Hêzên Sûriya Demokratîk (QSD) ji bo Wezareta Berevaniyê de lihevkirin heye lê hîn li ser nîqaş tên kirin. Di rojên bê de di diyalogên nû de dê mijara tevlêkirina Hêzên Ewlekariya Hundirîn (Asayîş) ji bo Wezareta Hundirîn were nîqaşkirin.”
Îlham Ehmed destnîşan kir ku entegrasyona QSD û Hêzên Ewlekariya Hundirîn di çarçoveya nenavendiyê de ne û li ser vê lihevkirin heye û got: “Helandin û înkarkirina destkeftiyan tune ye.”
Îlham Ehmed wiha domand: “Di aliyê rêveberî û destûrî de danezana destûrî pir girîng e, ne tenê ji bo şêniyên Bakur û Rojhilatê Sûriyeyê, lê ji bo tevahî gelê Sûriyeyê. Li ser danezana destûrî têbînî li ba beşên cuda yên civakê hene. Di mijarên nenavendî, mafên jinan û pirsgirêkên gel û neteweyan îsrareke mezin a guhartinê heye.”
Îlham Ehmed diyar kir ku eger heye li ser danezama destûrî û sîstema rêveberî ya parêzgehan danûstandin hebin û got: “Divê mekanîzma jiyana hevbeş were danîn. Divê rêveberî hevbeş be ne tenê ya beşekê civakê be. Divê têkiliyên me bi dewletên derdorê re hebin. Li Tirkiyeyê pêvajoya aştiyê heye û ev pêvajo ji bo ewlehiya Sûriyeyê jî girîng e ji ber ku pirsgirêkên gelan welatan bi hev ve girêdidin. Çareserkirina van pirsgirêkan di serî de pirsgirêka Kurdî jî pir girîng e.”
Konferans bi hilbijartina hevserokên yekitiyê bi dawî bû.
