Di civîna ku bi sedan kes tevlîbûn de behsa pêvajoya aştî, entegrasyona demokratîk û rola Rêber Apo hat kirin.
Di civînê de parêzera Buroya Hiqûqê ya Sedsalê Sûzan Akîpa di civînê de axivî û got, “Birêz Ocalan di hevdîtinan de got ku dê ji hevdîtinên aştiyê paşve gavê neavêje. Hêj şert û mercên azadiyê nehatine avakirin. Divê azad bibe. Dikarin vê meseleyê li ser ‘mafê hêviyê’ çareser bikin. Divê şert û merc wekhev bin. Entegrasyona demokratîk, ew e ku Kurd û Tirk weke du stûnên cuda bên cem hev. Misogerkirina hebûna Kurdan a di destûra bingehîn de, girîng e. Birêz Ocalan di hemû hevdîtinan de behsa girîngiya avakirina zemîna yasayî dike. Divê ev zemîn were avakirin.”
Ayla Akat Ata, jî got ku ew ê nêrînên gel bigihînin Rêber Apo.
Ayla Akat Ata, ji bo mitînga ku dê di 4’ê Çileyê de li Qada Stasyonê ya Amedê were lidar xistin jî banga tevlibûneke xurt kir.
Çetîn Arkaş jî got, “Heke aştiyek pêk were, dê mihasebeya her tiştekî were kirin. Em ê ji bo aştiyeke mayînde hevrû bibin û hev helal bikin. Heke armanca vê pêvajoyê aştî be, wê demê divê ne posterê Rêber Apo, ew bi xwe li vir be.”
Çetîn Arkaş, bertek nîşanî zimanê desthilatdarî û medyayê da û axaftina xwe wiha qedand: “Em ê qebûl nekin ku ji Rêberê gelekî re bibêjin ‘terorîst.’ Rûmetekî Kurdan heye. Bawerî wiha ava nabe. Heke di lihevkirinê de aştî hebe, wê demê divê gav were avêtin ku mirov bawer bike. Nexwe ya din dê rê li ber bêbaweriyê veke.”
