Platforma Jinan a Dersimê di 6’emîn salvegera windabûna Gulistan Doku de daxuyanî da. Pêkhateyên platformê, nûnerên partiyên siyasî, êxistinên civaka sivîl û gelek kes beşdarî daxuyaniyê bûn. Di daxuyaniyê de pankarta “Em dev jê bernadin, Gulistan Doku li ku ye?” hate nîşandan hilgirtin. Beriya daxuyaniyê ji Kolana Hunerê heta Sûka Binerd meşiyan. Piştî meşê, seroka Şaxa Jinan a CHP’ê Handan Kahraman Şanli li ser navê platformê daxuyanî xwend.
Handan Kahraman Şanli bi bîr xist ku xwendekara Zanîngeha Mûnzûrê Gulistan Doku ji 5’ê Çileya 2020’an vir ve winda ye û got ku malbata wê şeş sal in li bendê ye ku keça wan vegere. Handan Kahraman Şanli diyar kir ku malbat li Amedê dijî, roja ku Gulistan Doku winda bûye hatine Dersimê û windabûna xwe ragihandine û got, “Di encama lêkolînan de derket holê ku Gulistan Doku berî windabûna xwe li ber kafeyekê bi hevalê xwe yê berê Zaynal Abakarov re nîqaş kiriye û telefona wê ya desta herî dawî li ser Gola Bendava Ûzûnçayirê sînyala daye. Piştre, waliyê wê demê got ku Gulistan xwe kuştiye û cenazeyê wê dê were dîtin û radestî malbata wê were kirin. Ev şeş sal in di dozê de tu pêşketin çênebûye.”
‘EM Ê DEV JI PIRSÎNA GULISTAN DOKU BERNEDIN’
Piştre parlamentera Dersimê Ayten Kordu axivî û got, “Wekî jin, em ê ji bo Rojîn Kabaîş, ji bo Gulistan Doku û ji bo hemû jinên ku hatine windakirin, qetilkirin û dozên wan bi bêcezatî hatine veşartin, li kolanan têkoşîna xwe bidomînin. Em ê heta ku ev doz bê ronîkirin û sûcdar bên darizandin, têbikoşin. Em bi hev re ne, em yekgirtî ne û em ê qet dev ji pirsa ‘Gulistan Doku li ku ye?’ bernedin.”
‘KESÊN KU VÊ BI KEÇA MIN KIRIN TUNCER SONER Û KURÊ WÎ POLÎSÎ NE’
Bavê Gulistan Doku Halît Doku diyar kir ku wesayîta kurê waliyê wê demê Tuncer Soner di roja ku Gulistan Doku winda bû de 5-6 caran ji heman herêmê derbas bûye. Doku îdia kir ku keça wî ji aliyê kurê Tuncer Soner û Zaynal Abarakov ve hatiye revandin û got: “Serkêşên wan kurê Tuncer Soner û kurê wî polîsî ne. Ez edaletê dixwazim. Wesayîta kurê walî di roja ku keça min hat qetilkirin de 5-6 caran ji wir derbas bû. Çima we ev agahî bi me re parve nekir? Divê ew kesên ku ev yek bi keça min kirine hesab bidin. Ez mirovekî xizan im. Ger ez ne mirovekî xizan bûma, tiştê ku bi serê keça min de hatibû wê niha derketiba holê.”
‘JI BO GULISTAN NEAXIVE WÊ JI HOLÊ RAKIRIN’
Xwişka Gulistan Doku Aynûr Doku jî got, “Waliyê wê demê Tuncay Soner got, ‘Keça we xwe kuştiye.’ Ji wê rojê heta îro, di dosyaya dozger de behsa xwekuştinê nayê kirin. Çima Tuncay Soner Pira Dînarê kilît kir? Li cihê hemû kamera dixebitîn, ecûbe di 4 û 5’ê Çileyê de, nemaze piştî saet 7’ê êvarê ya 5’ê Çileyê ti kamera nexebitîn. Dîmenên kamerayan di dosyayê de tune bûn. Sedema vê çi ye? Bedena Gulistan jî tunekirin. Ji ber ku xerabiya organîzekirî bi serê Gulistan de hat û Gulistan wê qala vê yekê bikira. Ji bo Gulistan neaxive wê ji holê hat rakirin.”
