Serokdewletê Venezuelayê Nicolas Maduro û hevjîna wî Cilia Flores ku ji aliyê Dewletên Yekbûyî yên Emerîkayê (DYE) ve bi rengekî korsanwarî hate revandin, li New Yorkê derketin pêşberî dadgehê. Lîderê 63 salî bi kincên girtîgehê derxistin rûniştina destpêkê.
Maduro xwe weke “zilamekî durust” û serokê rewa yê welatê xwe pênase kir û ji dadger Alvin Hellerstein re got, DYE’yê ew ji Venezuelayê revandiye.
Maduro anî ziman ku îdîaname hîn nehatiye xwendin, her wiha ji mafên xwe nehatiye agahdarkirin û bi rêya wergêr got, “Haya min ji van mafan nîne. Niha birêz Dadger haya min ji van mafan çêdike.”
Maduro li dadgehê diyar kir ku ew wezîfeya Serokatiya Dewleta Venezuelayê dewam dike, sûcdariyên narkotîkê red kir û anî ziman ku ew bêguneh e.
Nicolas Maduro li dadgeha DYE’yê ku bi sûcdariyên narkotîkê tê darizandin got, “Ez bê sûc im, zilamekî durust im, hîn jî serok im. Ez xwe weke dîlgirtiyekî şer dibînim. Ji mala xwe ya li Caracasê hatim revandin.”
Dadger biryar da ku rûniştina têkildarî doza Maduro ji bo 17’ê Adarê taloq bike.
Li gel Maduro her wiha hevjîna wî Cilia Flores û kurê wî yê li Venezuelayê jî têne darizandin.
Li gorî medya DYE’yê darizandina jûrî dibe ku zêdeyî salekê dewam bike.
