Protestoyên girseyî yên ku li bajarê Abdananê yê ser bi parêzgeha Îlamê ya Îranê dest pê kirin, di demeke kurt de li tevahiya bajêr belav bûn. Li Abdananê ya ku bi deh hezaran kes derketin kolanan, gel bi meşan berê xwe da navenda bajêr.
Di dema meşê de Qereqola Polîsan a Abdananê û depoyeke artêşê ketin bin kontrola gel. Li gorî agahiyên hatine bidestxistin, qereqol bêyî ku tu pevçûn derkeve hatiye girtin. Hate hînbûn ku polîsên di qereqolê de mudaxaleyî çalakgeran nekirine, hinek polîsan bi gel re hevkarî kirine û piştî qereqol radestî gel kirine, ji herêmê vekişiyane. Piştî kontrolkirina qereqolê, protesto bi pîrozbahiyan berdewam kirin.
Lêbelê di saetên şevê de hate ragihandin ku hêzên zordar ên rejîma Îranê li Abdananê êrîşî gel kirine. Hate diyarkirin ku di êrîşan de bi dehan kes birîndar bûne û rewşa hinek birîndaran giran e. Tevî van bûyeran, li gorî agahiyên dawî, tevahiya bajarê Abdananê di bin kontrola gel de ye û hêzên zextê ji bajêr reviyane.
LI MELEKŞAHÊ HÊZÊN REJÎMÊ VEKIŞIYAN
Hevdem ligel geşedanên li Abdananê, li bajarê Melekşahê yê ser bi parêzgeha Îlamê jî geşedanên girîng rû dan. Hate ragihandin ku hemû hêzên rejîmê yên li bajêr ji aliyê gel ve hatine derxistin û Melekşah ketiye bin kontrola gel.
Hate ragihandin ku li seranserê bajêr qutbûna elektrîkê ya berfireh heye, lê belê helîkopterên rejîma Îranê li ser asmanê Melekşahê bi awayekî zêde difirin. Li gorî agahiyên ku gihîştine Aryen TV’yê, helîkopter bi taybetî li ser navenda bajêr digerin.
ÇALAKÎ DIDOMIN
Dema ku li Abdanan û Melekşahê kontrola gel a li ser bajaran berdewam dike, tê ragihandin ku li herêmê çalakî didomin. Li hemberî îxtîmala destwerdana nû ya hêzên rejîmê, bendewarî û protestoyên gel ên li kolanan didomin.
