Şahîn, yek ji şervanên enternasyonalîst ên YPG’ê ye ku ji sala 2018’an ve li Bakur û Rojhilatê Sûriyeyê têkoşîn dimeşîne, li ser pêşketinên dawî yên li herêmê nirxandin kir. Şahîn got ku piştî têkçûna leşkerî ya DAÎŞ’ê, niha destkeftiyên ku hatine bidestxistin di bin gefa êrîşên piralî de ne.
Şahîn ku di sala 2018’an de tevlî Şoreşa Rojava bûye û tevlî têkoşîna li dijî DAÎŞ’ê bûye, got ku piştî têkçûna leşkerî ya rêxistinê, niha aktorên cuda ketine nav qadê. Şahîn bal kişand ser êrîşên komên çekdar ên piştgiriya Tirkiyeyê û hevsengiyên siyasî yên nû yên li Sûriyeyê, ku destkeftiyên şoreşê dikin hedef û wiha got: Van zextan bi taybetî li ser gelên herêmê zêde dibin.
“DIXWAZIN TARÎTIYA DAÎŞ’Ê DÎSA FERZ BIKIN”
Şervanê enternasyonalîst ê YPG’ê Şahîn wiha got: “Em dibînin ku tarîtiya ku DAÎŞ li Kobanê, li Bakurê Rojava û li Bakur û Rojhilatê Sûriyeyê dixwest li ser gelan ferz bike, niha dîsa dixwazin bînin meydanê.” Şahîn diyar kir ku gelên herêmê ji bo parastina şoreş û jiyanê seferber bûne û berxwedan li hember hemû zextan didome.
LI GIŞTÎ ROJHILATA NAVÎN HEDEF GEL IN
Şahîn bal kişand ser pêşketinên li seranserê Rojhilata Navîn jî û got ku piştî qirkirina li Filîstînê, êrîşên li dijî civakên Dûrzî û Elewî li Sûriyeyê zêde bûne. Şahîn van êrîşan wekî parçeyên plansaziyeke firehtir a ji aliyê hêzên emperyalîst ve ji bo ji nû ve dizaynkirina Rojhilata Navîn nirxand û got ku ev êrîş ji hev cuda nîn in.
BANG LI PIŞTGIRIYA NAVNETEWÎ
Di dawiya daxuyaniya xwe de Şahîn bang li piştgiriya navnetewî kir û got ku ji Ewropayê bigire heta Afrîkayê, ji Asyayê bigire heta çar aliyên cîhanê divê her kes li hember vê yekê helwest bigire. Şahîn wiha got: “Li kêleka şoreşê rawestîn; ev berpirsiyariya her sosyalîst, antîfaşîst, demokrat û hemû gelên azadîxwaz e.”
