Berxwedana li dijî zêdekirina sefaletê û şertên koletî yên li depoyên Migrosê, bi pêşengiya sendîkaya DGD-Sen, niha di roja 11’emîn de bi biryardarî didome. Karkerên girêdayî şîrketa taşeron Us-Grup, ku heta 16 saetan dixebitin, li dijî astengkirina mafê sendîka hilbijartinê û tenê %28 zêdekirina li heqdesta sefalete derketin qadê.
Bi pêşengiya DGD-Sen, li 12 bajarên welat, bi taybetî li Stenbolê li depoyên Migrosê greva kar rawestandinê destpê kir. Rêveberiya Migrosê ji bo şikandina berxwedanê, ragihand ku karkeran digirin kadrotiyê, lê li hemberî vê yekê dixwaze wan bi zorê bike endamê sendîkaya zer Tez Koop-İş û guherandina qada karê wan dike şert. Karkeran ev lîstik dîtin û bi sendîkaya xwe ya hilbijartî re tevdigerin û berxwedanê mezin dikin.
Karkerên ku bi SMS’ê fêrbûn ku ji kar hatine derxistin berxwedana xwe birin ber mala patronê Anadolu Grub’ê Tuncay Ozîlhan. Polîsan mal xistin parastinê, daxwaza hevdîtinê red kirin, karker û rêvebirên sendîkayê bi kelepçeya paş ve hatin girtin û bi îşkenceyê hatin binçavkirin. Tevî hemû astengiyan, karker bi 7 roj 24 saet berxwedanê didomin.
Nursima Ozcan a 26 salî, 6 sal e li depoya Esenyurtê dixebite ji ANF’ê re axivî:
“Ez 14 saetan li ber devê rampa depoyê di bin sermayê de dixebitim, êvarê lingên xwe his nakim! Min di berê de giranî hildikişand, niha li dergehê sermayê kontrol dikim. Hevalên jin barên 20-25 kg hildikişînin, piraniya wan dîska pişt û stûyê wan heye. Ez jî du salan wisa xebitîm. Niha li sermayê, ji sibehê 08:00 heta êvarê 22:30’an dixebitim. Êvarê lingên min diêşin, nikarim rakevim.”
“Bi 50 saet mesaiyê tenê 34 hezar TL distînim! Kirê 20 hezar bûye, lê zêdekirina me %28 e. Meaşê me dîsa nêzî asgarî ye. Kira, fatûre, deyn hene… Ji xwarin û vexwarinê jî kêm dikim. Em bi deyn dijîn.”
“Me wek ‘personelê bêpîşe’ nîşan didin da ku hêsantir me biêşînin. Mobbing gelek e; dema em westiyayî bin an li dijî amirê xirab biaxivin, me sûrgûn dikin. Karên cur be cur dikin: ji paletê bigre heta paqijkirinê.”
“Kadrotî dikin şert ku em bibin endamê Tez Koop-İş a sendîkaya patronan. Patronê Us-Grup, Veysel Cîngoz, berê alîkarê serokê wê sendîkayê bû. Em naxwazin! Em dixwazin bi sendîkaya xwe DGD-Sen re bimînin.”
“Rêvebirê ÎK’ê Kezban Erol ji karkerekê re got: ‘Tu kambûrî, kê te bigire kar? Rûne cihê xwe!’ Ev nîşan dide çiqas karkeran biçûk dibînin.”
“Em ê heta dawiyê berxwedanê bidomînin, em ê şertên koletiyê qebûl nekin! Ji gel dixwazin: Migrosê boykot bikin û li gel me bin!”
