Di encama hevdîtinên QSD û Şamê de li gorî peymanê diviyabû dawî li dorpêça li ser Kobanê bihata anîn. Li gorî daxuyaniyên QSD’ê, dihate payin ku di demeke nêz de dorpêç bihata rakirin.
Li Kobanê ku nêzî 500 hezar mirov hene zêdeyî 16 roj in dorpêçeke giran heye. Bajar ji çar aliyan ve hatiye dorpêçkirin û bi ti awayî alîkarî nikare bigihêje bajêr. Malzemeyên tibî qediya ne, sotemenî û xurek jî li ber qedandinê ye. Eleketrîk qut bûye, înternet hema bibêje nîne, nexweşxane nema dikarin kar bikin. Ji ber nebûna dermên nexweşî jî gelekî belav dibe.
‘BI TÎ Û BIRÇÎBÛNÊ NIKARIN TERBIYE BIKIN’
Emîne Muslim a ku şeş sal berê ji Girê Spî koçî Kobanê kiriye, banga lezgîn li gelê Kurd kir. Muslim destnîşan kir ku divê dorpêç tavilê bi dawî bibe û got, “Me ev bajar bi xwîna xwe rizgar kir. Divê Kurd hemû rabin ser piyan. Bi tî û birçîbûnê nikarin me terbiye bikin.”
Emîne Muslim diyar kir ku Kobanê ji bo her Kurdî bajarekî sembolîk e û berdêlên giran bi bîr xist ku li hemberî êrişên DAÎŞ’ê hate dayin: “Beriya bi salan dema ku çeteyên DAÎŞ’ê êriş birin ser vî bajarî, Kurdan hemûyan û şervanên Kurd canê xwe dan û Kobanê rizgar kirin. Bi dayina berdêlên giran ev bajar hate rizgarkirin. Divê em bi rê û rêbazekê vê dorpêçê bi dawî bikin.”
‘ÇAR ALIYÊN ME DORPÊÇKIRÎ NE’
Asya Kobanê ya ji gundekî Kobanê qala zor û zehmetiyên li herêmê kir. Asya Kobanê ragihand ku gundî nikarin li malên xwe vegerin, ji ber ku dagirkirî ne û pêwîstiyên bingehîn jî li ser wan hatiye birîn. Asya Kobanê got, “Ji destpêkirina dorpêça li ser Kobanê û vir ve em nikarin xurekê peyda bikin. Elektrîk, înternet nîne. Derman nîne, dermangeh girtî ne. Em nikarin pêwîstiyên xwe yên jiyanî bi cih bînin. Bi hezaran mirov nexweş in, lê belê malzemeyên tibî nîne.”
Asya Kobanê bang li Kurdan, hêzên li herêmê û civaka navneteweyî kir û got, “Ev dorpêça li ser Kobanê divê tavilê bê rakirin. Her kesên ku mafên mirovan diparêzin divê vê bangê bibihîzin. Çi ji me dixwazin, gelo li bendê ne ku em teslîm bibin, bimirin? Çar aliyên me hatine dorpêçkirin. 70 milyon Kurd divê vê rewşê bibînin. Banga lezgîn li her kesî dikim.”
