Ji bo protestokirina 27’emîn salvegera komploya navnetewî û daxwaza azadiya Rêber Apo, Endamê Konseya Rêveber a KCK’ê Zubeyîr Aydar, Hevserokê KNK’ê Ahmet Karamus û Berdevka Înisiyatîfa Yekîtiya Jinên Kurd a Ewropayê Şîlan Emînoglû bang li gelê Kurd kirin.
Zubeyîr Aydar diyar kir ku Kurd û Kurdistan di pêvajoyeke dîrokî re derbas dibin û pirsgirêka Kurd êdî bûye rojeveke navnetewî. Aydar anî ziman ku gelê Kurd bi gef û metirsiyên mezin re rû bi rû ye û wiha domand:
“Lê belê li hemberî van metirsiyan derfet û fersend jî hene. Di vê serdemê de gelê Kurd hem li Rojava û hem jî li Rojhilat dîsa ket rojeva cîhanê. Rojava bi êrîşên mezin re rû bi rû ma. Gelê me li dijî Komploya 15’ê Sibatê nerazîbûneke netewî nîşan dabû. Di pêvajoya Kobanê de jî gelê Kurd hem li her çar parçeyan û hem jî li her derê cîhanê seferber bû. Wijdana rayagiştî ya cîhanê xist tevgerê. Îsal 27’emîn salvegera komploya navneteweyî ye. Ji bo protestokirina komploya navneteweyî, daxwaza azadiya Rêber Apo û yekîtiya gelê Kurd, divê di 14’ê Sibatê de hemû Kurdistaniyên li Ewropayê beşdar bibin.”
Hevserokê KNK’ê Ahmet Karamus jî bal kişand ser geşedanên li Rojhilata Navîn û got ku gelê Kurd di pêvajoyekê re derbas dibe ku paşeroja wî lê tê nivîsandin. Karamus destnîşan kir ku azadiya Rêber Apo ji vê pêvajoyê nayê veqetandin û got: “Bila gelê me bizanibe ku em di pêvajoyeke girîng re derbas dibin. Li Rojava û hemû parçeyên din paşeroja me ji nû ve tê nivîsandin. Em di pêvajoya têkoşîna hebûnê de ne. Di vê serdemê de em yekîtî û yekparebûna netewî ya gelê Kurd gelekî girîng dibînin. Di serî de xebatên siyasî, di hemû xebatên xwe de esasgirtina vê yekîtiyê wê paşeroja me diyar bike. Êdî divê em di hemû çalakiyên xwe de li dijî cîhanê bi hev re bin. Ji bo vê yekê, di 14’ê Sibatê de ji bo statuya Rojava û azadiya Birêz Abdullah Ocalan divê em hemû li wir bin. Werin em li ber Yekîtiya Ewropayê daxwaz û yekîtiya gelê Kurd nîşan bidin.”
Berdevka Înisiyatîfa Yekîtiya Jinên Kurd a Ewropayê Şîlan Emînoglû jî diyar kir ku di serdemeke ku destkeftiyên jinan û modela jiyana hevpar a demokratîk li Rojava têne hedefgirtin de, ew ji bo nirx û paşeroja gelê Kurd li ser piyan in. Emînoglû destnîşan kir ku azadiya Rêber Apo parçeyekî neguher ê vê pêvajoyê ye û wiha got: “Ji 6’ê Çileyê ve li ser Rojava êrîşeke mezin heye. Êrîşên komploger ên ku li du taxên Kurd ên Helebê dest pê kirin, rasterast gelê me hedef girtin. Êrîşên qirkirinê yên li ser gelê me bi vî awayî dan destpêkirin. Li dijî van êrîşan gelê me li Ewropa û her çar parçeyan li ser piyan e. Tevahiya cîhanê dizane ku ev êrîş destkeftiyên jinan û pergala demokratîk a li Rojava hedef digirin. Ev êrîş ne tenê bi destê hikûmeta Sûriyeyê, bi destûr û erêkirina pergala navnetewî hatine destpêkirin. Gelê Kurd li dijî vê yekê seferber bûye. Ji ber wê yekê divê gelê me di 14’ê Sibatê de bi daxwaza ‘Ji Rêber Apo re Azadî, ji Rojava re Statû’ li Strasbourgê li qadan be.”
