Parlamenterê Meclîsa Neteweyî ya Fransayê, endamê “La France Insoumise” û endamê delegasyona Fransayê ya MPKE’ê Emmanuel Fernandez, têkildarî tecrîda 27 salan a li ser Rêber Apo, helwesta saziyên Ewropî û êrîşên li ser Rojavayê ji ANF’ê re nirxandin kirin.
Fernandez destnîşan kir ku hem wekî parlamenterekî Fransî û hem jî wekî endamê MPKE’ê di mijara standardên girtîgehan de berpirsyar in û got ku şert û mercên girtina Rêber Apo ne li gorî pîvanên navneteweyî ne.
Fernandez wiha axivî: “Tirkiye endamê Konseya Ewropayê ye û bi taybetî di mijara mercên girtîgehan de mecbûr e ku li gorî standardên navneteweyî tevbigere. Birêz Ocalan 27 sal in di girtîgehê de ye û salên dawî di şaneyê de tê girtin. Bi biryarî şert e ku karibe bi parêzerên xwe re bi rêkûpêk hevdîtinê bike, bi cîhana derve re têkiliyê deyne û ev tecrîd bi dawî bibe.”
DIVÊ CPT ERKA XWE BI CIH BÎNE
Fernandez bi bîr xist ku saziya berpirsyarê kontrolkirina mercên girtîgehan CPT ye û bal kişand ser berpirsyariya saziyên Ewropî:
“Saziya ku erkdar e van mercan mîsoger bike CPT ye. Divê herî kêm rêz li mercên girtîgehê bê girtin.”
Fernandez anî ziman ku ew li ser navê La France Insoumise û Meclîsa Neteweyî ya Fransayê diaxive û daxwaz kir ku mafên Rêber Apo bên mîsogerkirin.
DIVÊ KOMKUJIYÊN LI SER ROJAVA BÊN RAWESTANDIN
Endamê MPKE’ê Fernandez bal kişand ser êrîşên li ser Rojava ku ji 6’ê Çileya 2026’an vir ve berdewam dikin û bal kişand ser rabirdûya Colanî ku di serê “Hikûmeta Demkî ya Sûriyeyê” de ye.
Fernandez got, “Em dizanin ku Birêz Colanî bi navê xwe yê li ser dikê El-Şara– ji ku tê û rabirdûya wî ya cîhadî çi ye. Bi êrîşên mehên dawî yên li ser Kobanê û Rojava re cewherê wî yê rastî careke din derket holê.”
Fernandez li ser navê La France Insoumise axivî û xwest ev êrîş demildest bên rawestandin û got, “Ez piştgiriya xwe ya tam ji bo gelê Kurd tînim ziman.”
DIVÊ TEKILIYÊN XWE BI HÊZÊN TUNDIYÊ BIRÊXISTIN DIKIN RE QUT BIKE
Fernandez helwesta Yekîtiya Ewropayê û dewletên Rojava bi tundî rexne kir. Fernandez bal kişand ser kiryarên tundûtûjiyê yên komên ser bi rejîma Sûriyeyê ve û got ku nayê qebûlkirin ku Ewropa têkiliyên xwe bi van hêzan re bidomîne.
Fernandez diyar kir ku, “Yekîtiya Ewropayê divê têkiliyên xwe bi wan hêzên ku rêzê li yekparebûna fîzîkî ya gel nagirin û van kiryarên sûc organîze dikin an teşwîq dikin re qut bike.”
Fernandez destnîşan kir ku dewleta Tirk jî di vê pêvajoyê de rol lîstiye û got, “Em dizanin ku berjewendiya Birêz Erdogan jî heye ku bi Birêz Colanî re bixebite.”
DIVÊ BOMBARDIMAN BI DAWÎ BIBE Û AMBARGO RABE
Fernandez destnîşan kir ku divê welatên Rojavayî ne tenê di asta gotinê de, di asta kiryarê de jî gavên berbiçav biavêjin: “Divê ev komkujî bi dawî bibin. Divê bombarduman raweste. Divê av û elektrîk ji nû ve bên peydakirin. Divê herikîna alîkariya mirovî bê mîsogerkirin. Û di encamê de divê ewlehiya gelê Kurd bê dabînkirin.”
Daxuyaniyên endamê MPKE’ê Emmanuel Fernandez nîşan da ku hem tecrîda li ser Rêber Apo û hem jî êrîş û ambargoya li ser Rojava divê li ber saziyên Ewropî careke din werin rojevê.
