Meclisa Gel a Şengalê di 19’emîn salvegera komkujiya 14’yê Tebaxa 2007’an a bajarokê Tilizêr û Komelgeha Sîba Şêx Xidir, ji bo şehîdên komkujiyê merasîma bîranînê lidar xist. Merasîma bîranînê li ser gora komî ya li goristana Şêx Menda ya li gundê Cidalê ku dikeve başûrê çiyayê Şengalê, hate lidarxistin.
Di merasîmê de gelek endam û rêveberên saziyên girêdayî Meclisa Gel a Şengalê amade bûn, kesên tevlî merasîmê bûyîn li ser gora komî gul danîn û mûm pêxistin.
Hevserokê Meclisa Gel a Şengalê Azad Hisên di bîranînê de axivî, destpêkê şehîdên komkujiyê bibîr anî û got: “Em îro ji bo bîranîna şehîdên komkujiya 14’yê Tebaxa 2007’an bibîr bînin, li ser gora komî ya goristana Şêx Mendî kom bûne. 19 sal li ser komkujiya bajarokê Tilizêr, Komalgeha Sîba Şêx Xidir û gundê Izêr re derbaz bûn. Kesên di van êrişên hovane de jiyana xwe ji dest dan, kesên bê guneh bûn û rojane jiyanek xwe ya sade derbaz dikirin.”
Azad Hisên diyar kir ku tevî derbazbûna ewqas salan heta niha ev gora komî nehatiye vekirin û wiha domand: “Di êrişa ku bi çar barhilgirên tejî TNT hate kirin de, yek li navenda bajarokê Tilizêr, ya duyem li Komelgeha Sîba Şêx Xidir û sêyem jî li gundê Izêr hatin teqandin. Di nav de zarok, ciwan, jin û kesên bi temen jiyana xwe ji dest dan. Em hemû şehîdên komkujiyê bibîrtînin. Di wê komkujiyê de bi sedan kesan jiyana xwe ji dest dan, bi sedan birîndarbûn û gelek kes jî heta niha çarenûsa wan ne diyare.”
Hevserokê Meclisa Gel a Şengalê Azad Hisên da zanîn ku di dema êrişê de laşên mirovan parçe parçe bûn ku êdî nedihatin naskirin û wiha pê de çû: “Wê demê me wan parçeyên laşên mirovan hemû komkirin û xistin vê gora komî. Li ser de 19 sal derbaz bûn, lê heta niha ev gora komî nehatiye vekirin. Divê ev gora komî bê vekirin û hestiyên van qurbaniyan bibin tiba edlî, nasnameyên qurbaniyan bên diyarkirin û radestî malbatên wan bikin. Di heman demê de heq û hiqûqa van cangoriya bê dayîn.”
Piştî axaftinê kesên tevlî merasîma bîranînê bûyîn, gul danîn ser gora komî û mûm pêxistin.
