Şaxên Komeleya Mafên Mirovan a Îzmîr, Stenbolê û Înîsiyatîfa ji Girtiyên Nexweş re Azadî bi armanca balê bikêşin ser rewşa girtiyên nexweş daxuyanî dan û xwestin girtiyên nexweş Enver Yanik, Mehmet Huseyîn Maral û Ergîn Aktaş demildest werin berdan û bi rêk û pêk werin dermankirin.
STENBOL
Komîsyona Girtîgehan a Şaxa Komeleya Mafên Mirovan (ÎHD) a Stenbolê di hefteya 752’yemîn de li pêşiya avahiya komeleyê çalakiya “Rûniştina F’yê” li dar xist. Malbatên girtiyên nexweş û gelek kes beşdarî daxuyaniyê bûn. Di çalakiya vê hefteyê de ji bo girtiyê nexweş Ergîn Aktaş ku li Girtîgeha Metrîsê ya Tîpa R’ê tê girtin, daxuyanî hate dayîn.
Di daxuyaniyê de pankartên “Tedawî maf e, nayê astengkirin” û “Bila girtiyê nexweş Ergîn Aktaş bê berdan” û wêneyên girtiyên nexweş hatin rakirin.
Daxuyanî ji aliyê endama ÎHD’ê ya Stenbolê Meryem Bars ve hate xwendin.
ENQERE
Însiyatîfa ji Girtiyên Nexweş re Azadî, di hefteya 624’emîn a çalakiya xwe de têkildarî rewşa girtiyê nexweş Mehmet Huseyîn Maral li Kolana Sakaryayê ya navçeya Çankaya ya Enqereyê daxuyanî da. Endamên Şaxa Komeleya Mafên Mirovan (ÎHD) a Enqereyê û parastvanên mafên mirovan beşdarî daxuyaniyê bûn. Di çalakiyê de pankarta “Tedawî maf e nayê astengkirin, divê girtiyên nexweş demildest bên berdan” hate rakirin. Girseyê dirûşmên “Bila girtiyên nexweş bên berdan” û “Tecrîd êşkence ye, divê tecrîd bi dawî bibe” berz kirin.
Rêvebera ÎHD’ê ya şaxa Enqereyê Kezîban Kalin daxuyanî xwend.
ÎZMÎR
Şaxa Komeleya Mafên Mirovan (ÎHD) a Îzmîrê, ji ber nexweşiyên giran û pir alî yên Enver Yanîk ê ku li Girtîgeha Tîpa R a Menemenê tê ragirtin û astengiyên xwe gihandina dermankirinê, li ber Sûmerbanka Kevn a Konakê daxuyaniyek da. Di daxuyaniyê de pankarta “Girtiyên nexweş dimirin bêdeng nemîne nebe şirîkê sûc” hat vekirin. Hevberdevka Komîsyona Girtîgehan a Navendî ya ÎHD’ê Parêzer Nazli Tûran metna daxuyaniyê xwend.
