Li gorî projeksiyonên hilbijartinê yên Associated Pressê Demokratan hem li Meclîsa Nûneran hem jî li Senatoyê kontrol xistin destê xwe û serweriya Komargeran a li Kongreyê bi dawî kirin.
Bi dema Brukselê heta saet 09:00 jimartina dengan dewam dikir. Bi taybetî 74 kursiyên li Meclîsa Nûneran hîn diyar nebûne.
Di rewşa heyî de tabloya derketiye holê bi vî rengî ye:
Meclîsa Nûneran: Demokratan 225 kursî, Komargeran 136 kursî bi dest xistin.
Senato: Demokratan 54 kursî, Komargeran 43 kursî bi dest xistin.
Waliyên Eyaletan: Heta niha 25 waliyên Demokrat û 20 waliyên Komarger hatin hilbijartin.
Serketina Demokratan bi taybetî li eyaletên ku Komarger demeke dirêj lê xurt bûn bal kişand. Li Teksasê Gina Hinojosa ya Demokrat Greg Abbott ê Komarger têk bir û bû yekemîn waliya jin a bi eslê xwe Latîn a li eyaletê. Serketina Hinojosa tê wê wateyê ku Demokrat ji salên 1990’î û vir ve cara yekemîn e ku walîtiya Teksasê qezenç dikin.
Li heman eyaletê di pêşbirka senatoriyê de jî James Talarico yê Demokrat bi ser ket. Serketina Talarico ya li hemberî Ken Paxton ê Komarger ji aliyê têkçûna namzetên bi piştgiriya Trump girîng tê dîtin.
BI SEDAN MILYON DOLAR ÊN ELON MUSK JÎ BI KÊR NEHAT
Li gel piştgiriya bi sedan milyon dolarî ya Elon Musk a ji bo namzetên Komarger, Demokrat bi ser ketin.
Li Michiganê Abdul El-Sayed ê Demokrat li hemberî Mike Rogers ê Komarger bi ser ket û di hilbijartinên Senatoyê de serketina xwe ragihand. Serketina doktor El-Sayed ku ji baskê çep ê Partiya Demokrat tê, ji aliyê hilbijartina yekemîn senatorê Misilman ji bo Senatoya DYE’yê girîng û dîrokî tê dîtin. El-Sayed di kampanya xwe ya hilbijartinê de mijarên newekheviya aboriyê, xizmetên tenduristiyê û mafên kedkaran da pêş.
Ji ber ku Demokrat di herdu baskên Kongreyê de bi ser ketin, rêveberiya Trump wê zehmetiyê bikişîne ku rojeva xwe ya qanûndanînê bi pêş ve bibe. Serweriya nû ya li herdu baskên Kongreyê wê derfetê bide kontrolkirin, lêpirsîna li ser polîtîkayên rêveberiyê û têkoşîna siyasî ya li ser Kongreyê xurtir bike.
